காங். செயற்குழு உறுப்பினர்கள்... பிரியங்காவுக்கு அடுத்ததாக 16-வது இடத்தில் ப.சிதம்பரம்
சென்னை: அகில இந்திய காங்கிரஸ் கமிட்டியின் புதிய செயற்குழு உறுப்பினர்கள் பட்டியலில் பிரியங்கா காந்திக்கு அடுத்ததாக 16-வது இடத்தில் ப.சிதம்பரத்தின் பெயர் இடம்பெற்றுள்ளது.
காங்கிரஸ் கட்சியின் முதுபெரும் தலைவர்களில் ஒருவர் ப. சிதம்பரம். காங்கிரஸ் அரசுகளில் மத்திய நிதி அமைச்சராக, உள்துறை அமைச்சராகவும் பதவி வகித்தவர்.
அகில இந்திய காங்கிரஸ் கமிட்டியின் புதிய தலைவர் யார் என்கிற விவாதம் வரும் பொழுது ப. சிதம்பரத்தின் பெயரும் அடிபடுவது வழக்கம். இந்த நிலையில் காங்கிரஸ் இடைக்கால தலைவர் சோனியா காந்தி இன்று அக்கட்சியில் அதிரடி மாற்றங்களை கொண்டு வந்துள்ளார்.
காங்கிரஸ் செயற்குழு முழுமையாக மாற்றி அமைக்கப்பட்டுள்ளது. செயற்குழுவின் 16 புதிய உறுப்பினர்களை அறிவித்துள்ளார் சோனியா காந்தி.
காங். செயற்குழு மாற்றியமைப்பு- தமிழக பொறுப்பாளராக தினேஷ் குண்டுராவ், உ.பி.க்கு பிரியங்கா நியமனம்
இதில் மூத்த காங்கிரஸ் தலைவரான ப.சிதம்பரத்தின் பெயர் 16-வதாக இடம்பெற்றுள்ளது. காங்கிரஸ் கட்சி பொதுச்செயலாளரான பிரியங்கா காந்திக்கு (15வது) அடுத்ததாக ப. சிதம்பரம் பெயர் இடம் பெற்றுள்ளது. இதுவரை காங்கிரஸ் செயற்குழுவின் நிரந்தர அழைப்பாளராக இருந்தார் ப.சிதம்பரம். தற்போது முழுநேர செயற்குழு உறுப்பினராக அவர் நியமிக்கப்பட்டுள்ளார்.
மேலும் சோனியா காந்திக்கான ஆலோசனை குழு ஒன்றும் அமைக்கப்பட்டுள்ளது. இதில் ஏகே அந்தோணி, அகமது பட்டேல், அம்பிகா சோனி, கேசி வேணுகோபால், முகுல் வாஸ்னிக், ரந்தீப் சிங் சுர்ஜிவாலா ஆகியோர் இடம்பெற்றுள்ளனர்.