பாஜகவில் சேரவே இல்லை..அதுக்குள்ள அக்கப்போரா? Best gymnastic பல்டி... குஷ்பு முடிவு பற்றி எஸ்வி சேகர்
சென்னை: நடிகை குஷ்பு பாரதிய ஜனதா கட்சியில் இணைவதற்கு எதிர்ப்பு தெரிவிக்கும் விதமாக அக்கட்சியின் நடிகர் எஸ்.வி.சேகர் Best gymnastic பல்டி என கிண்டலடித்திருக்கிறார்.
காங்கிரஸ் கட்சியின் தேசிய செய்தித் தொடர்பாளராக இருக்கும் குஷ்பு பாரதிய ஜனதா கட்சியில் இணைய உள்ளார். டெல்லியில் பாஜக தேசிய தலைவர் ஜேபி நட்டா முன்னிலையில் திங்கள்கிழமையன்று அக்கட்சியில் குஷ்பு இணைகிறார்.
கடந்தவாரம் வரை பாஜகவை கடுமையாக விமர்சித்தவர் குஷ்பு. அதேநேரத்தில் பாஜகவில் இணைய வருமாறு அந்த கட்சியின் தலைவர்கள் விடுத்த அழைப்புக்கு பதில் கூறாமலும் இருந்து வந்தார் குஷ்பு.
மாற்றம்-தவிர்க்க முடியாதது: பாஜகவில் இணைவதை காவி உடையில் ட்விட்டரில் சூசகமாக அறிவித்த குஷ்பு
இந்நிலையில்தான் காங்கிரஸ் கட்சியில் இருக்கிறீர்களா? என்ற கேள்விக்கு கூட நோ கமெண்ட்ஸ் என கூறி பாஜகவுக்கு போவதை உறுதி செய்திருக்கிறார் குஷ்பு. முன்னதாக சனிக்கிழமையன்று தமது ட்விட்டர் பக்கத்தில் காவி உடையுடன் மாற்றம் என்பது தவிர்க்க முடியாதது எனவும் குஷ்பு பதிவிட்டிருந்தார்.
இதனிடையே குஷ்பு பாஜகவில் இணைவதை எதிர்க்கும் வகையில் அந்த கட்சியைச் சேர்ந்த நடிகர் எஸ்.வி.சேகர் கிண்டலடித்து ஞாயிற்றுக்கிழமை இரவு பதிவு ஒன்றை போட்டுள்ளார். அதில், சனிக்கிழமை ஒண்ணு சொல்லிட்டு அதையே ஞாயிற்றுக்கிழமை மொத்தமா மாத்தி பேச ரொம்ப திறமை வேணும் நாட்டாமை . Best gymnastic பல்டி. என கிண்டலடித்துள்ளார் எஸ்.வி.சேகர்.