7 வருஷம் கட்டம் சரி இல்லையாம்.. தம்பிக்கு ஸ்ட்ரெயிட்டா து.மு. பதவி.. எல்லாம் ஜாதகம் படுத்தும் பாடு
சென்னை: தமிழக சட்டசபை தேர்தல் களத்தில் எத்தனை பரபரப்பு இருக்கிறதோ அதே அளவுக்கு ஜோதிடர்கள் வீடுகளும் களைகட்டிக் கொண்டிருக்கிறது.
என்னதான் பெரியார் அரசியலை பேசினாலும் தமிழகத்தில் ஜோதிட அரசியல்தான் ஜெகஜோதியாக பிரகாசித்துக் கொண்டிருக்கிறது. அந்த கட்சி, இந்த கட்சி, ஆளுங்கட்சி, எதிர்க்கட்சி என்ற பாகுபாடு எதுவும் இல்லை.
அந்த ஜோதிடர் அவருக்கானவராச்சே.. நாம போனா ரகசியம் அங்கே போயிடுமோ என்ற அச்சமெல்லாம் எதுவும் இல்லை.. கொழிக்கும் செல்வத்தால் எல்லோரது வாயை மூட முடியும் என்ற அசால்ட் நம்பிக்கையில் ஜோதிடக்காரர்களை நோக்கி படையெடுக்கின்றனர் அரசியல்வாதிகள்.
இப்படி ஜோதிடம் பார்க்கப் போன இடத்தில் இன்னும் 7 வருஷத்துக்கு கட்டம் சரியில்லாமல் இருக்கிறதே.. என தயங்கி இருக்கின்றனர் ஜோதிடர்கள். ஏதாவது பரிகாரம் செய்து பார்க்கலாம் எனவும் ஒருதரப்புக்கு ஆலோசனை சொல்லப்பட்டிருக்கிறது. அப்படியா அவருக்கு பிரச்சனையா இருந்தா என்ன... இந்த ஜாதகம் பாருங்க என கொடுக்கப்பட்டிருக்கிறது.
அடடே! அந்த ஜாதகத்தை விட இவரோடது பரவாயில்லை.. பேசாம இவரை வைத்து எல்லாமே செய்துடலாமே என கூறியிருக்கிறது ஜாதகக் குரல்.. அப்படி எல்லாம் செய்துவிட முடியாது.. கொஞ்ச நாள் அவரு இருக்கட்டும்.. அப்புறமா இவரை து.மு.வாக்கி மெல்ல மேலே கொண்டு வந்துடலாம் என ஜோதிடர் வீட்டிலேயே கணக்குப் போட்டுவிட்டு திரும்பியிருக்கிறார்களாம்.
என்னதான் நடக்கும் நடக்கட்டுமே!