இருக்கிற அணிகள் போதாதுன்னு இதுவேறயா... திமுகவில் உருவாகுதாம் சோசியல் மீடியா விங்?
சென்னை: திமுகவில் புதியதாக சோசியல் மீடியா விங் என்ற அணி உருவாக்கப்படுவதற்கான நடவடிக்கைகள் மேற்கொள்ளப்படுவதாக தகவல்கள் வெளியாகி உள்ளன.
திமுகவில் மறைந்த முன்னாள் முதல்வர் கருணாநிதி இருந்த காலத்தில் அவரது கட்டுப்பாட்டிலும் கண்ணசைவிலும்தான் கட்சியின் அத்தனை நடவடிக்கைகளும் இருந்தன. கருணாநிதிக்கு குடும்ப ரீதியாக அழுத்தங்கள் பல நேரங்களில் தரப்பட்டிருக்கின்றன.
சென்னை.. சுவர் விளம்பரத்திற்காக திமுக-பாஜகவினர் அடிதடி.. திமுக வட்டச் செயலாளர் சிறையிலடைப்பு
புதிய அதிகார மையங்கள்
ஆனாலும் கட்சியை தம்முடைய நேரடிக் கட்டுப்பாட்டிலேயே கருணாநிதி காலம் முழுவதும் வைத்திருந்தார். கருணாநிதி மறைவுக்குப் பின்னர் திமுகவில் தலைமை குடும்பத்தின் பெயரால் பல அதிகார மையங்கள் மையங்கொண்டிருக்கின்றன. இதுதான் திமுகவில் பெரும் சலசலப்புக்கும் காரணமாக இருக்கிறது.
ஆளுக்கொரு திசையில் ஒவ்வொரு டீமும்..
டெல்லி அரசியலை கவனிக்க ஒரு டீம், முரசொலி விவகாரங்களுக்கு ஒரு டீம், இளைஞரணி செயலாளருக்கு ஒரு டீம், தலைவருக்கு ஒரு டீம், இவை இல்லாமல் தேர்தல் வியூகத்துக்கு பிகே டீம், கட்சிக்கான தகவல் தொழில் நுட்ப அணி என ஒரு டீம்.. இப்படி பல அதிகார மையங்களாக ஆளுக்கு ஒரு திசையில் பயணிக்கின்றன.
அதிகார மையங்களின் பனிப்போர்
இந்த அதிகார மையங்களுக்கு இடையேயான பனிப்போர் தொடர்ந்து நடைபெற்று வருகிறது. இதனால் திமுகவினர் எந்த டீம் சொல்வதைக் கேட்பது என்பது தெரியாமல் குழம்பிப் போயிருக்கின்றனர். திமுகவில் ஏற்கனவே மகளிர் அணி ஒன்று இருக்கிறது. இது போதாது என்று அதிமுக பாணியில் இளம்பெண்கள் பாசறையை உருவாக்கும் முயற்சிகளும் ஒருபுறம் நடக்கிறது.
திமுக சோசியல் மீடியா விங்
இத்தனையும் போதாது என்று சோசியல் மீடியா விங் என ஒன்று உருவாக்கும் முயற்சிகளும் மேற்கொள்ளப்பட்டு வருகிறதாம். ஏற்கனவே பல டீம்களில் இடம்கிடைக்காத பலரும் இந்த சோசியல் மீடியா விங்கில் எப்படியாவது இடம்பிடித்துவிடலாம் என இலவு காத்து கிடக்கிறார்களாம். ஆனால் இருக்கிற குழப்பத்துக்கே தீர்வு இல்லை.. இனியும் ஒரு புதிய டீமா என பொங்கிப் பார்க்கின்றனர் சீனியர்கள்.