சென்னையில் தங்கம் விலை சரசரவென சரிவு... ஒரே நாளில் படுவீழ்ச்சி
சென்னை: ஈரான் அமெரிக்கா இடையே ஏற்பட்ட போர் பதற்றத்தால் கடந்த இரண்டு நாட்களாக ராக்கெட் வேகத்தில் ஏறிய தங்கத்தின் விலை எரிபொருள் தீர்ந்த பிறகு கீழே விழுவதைப் போல் பழைய நிலையை நெருங்கியுள்ளது.
சென்னையில் டிசம்பர் 2வது வாரத்தில் 29 ஆயிரம் ரூபாய்க்கு விற்பனையான தங்கத்தின் விலை தை நெருங்கும் நிலையில் ஜனவரி பிறந்த போது 30 ஆயிரத்தை நெருங்கியது.
ஜனவரி 2ம் தேதி ரூ.28,880க்கு விற்பனையான ஒரு பவுன் தங்கத்தின் விலை அதற்கு மறுநாளே அதாவது ஜனவரி 3ம் தேதி ரூ. 640 அதிகரித்து, ரூ.30,520க்கு விற்பனையானது. அதன்பிறகு தொடர்ந்து ஏறுமுகம் ஆனது. ஜனவரி 4, 5ம் தேதிகளில் 30,656க்கும் விற்பனையானது.
ஜனவரி 6ம் தேதி ரூ. 31,168க்கும், ஜனவரி 7ம் தேதி சற்று குறைந்து ரூ. 30,904க்கும் விற்பனையானது.
ஜனவரி 8ம் தேதியான நேற்று ஒரு சவரன் தங்கம் விலை ரூ. 31176க்கு விற்பனையாகி புதிய சாதனை படைத்தது.
இந்நிலையில் இன்று சென்னையில் ஒரேயடியாக ஒரு சவரனுக்கு ரூ.736 ரூபாய் சரிந்து ரூ.30440க்கு விற்பனையாகிறது. சென்னையில் ஒரு கிராம் தங்கத்தின் விலை வியாழக்கிழமை மாலை நிலவரப்படி ரூ.3805க்கு விற்பனையானது.