வெற்றி... வெற்றி.. என வாய் நிறைய அழைத்து இனி யாரிடம் பேசப்போகிறோம்: டிடிவி தினகரன் கண்ணீர்
சென்னை: என்ன நடந்தாலும் தியாகத்தின் பக்கம்- உண்மையின் பக்கம் நிற்பேன் என உறுதியுடன் இறுதிவரை நின்றவர் கட்சியின் பொருளாளர் வெற்றிவேல் என்று அமமுக பொதுச்செயலாளர் டிடிவி தினகரன் இரங்கல் தெரிவித்துள்ளார்.
அமமுக பொருளாளர் வெற்றிவேல், கொரோனா பாதிப்பால் காலமானார். அவரது மறைவுக்கு இரங்கல் தெரிவித்து டிடிவி தினகரன் வெளியிட்டுள்ள அறிக்கை:
மூப்பனார், ஜெ., சசிகலா- தினகரனிடம் உச்சகட்ட விசுவாசத்தின் அடையாளமாக இருந்தவர் வெற்றிவேல்!
துயரம் தொண்டையை அடைக்கிறது
அம்மா மக்கள் முன்னேற்றக் கழகத்தின் பொருளாளரும் எனது இனிய நண்பருமான வெற்றிவேல் மறைந்தார் என்ற செய்தியை நம்ப முடியாமல் தவிக்கிறேன். மிகுந்த வேதனையும் சொல்ல முடியாத துயரமும் என் தொண்டையை அடைக்கிறது. ஜெயலலிதா, சசிகலாவின் பேரன்பைப் பெற்றவர்.
தியாகத்தின் பக்கம்
என் மீது அளவிட முடியாத பாசம் கொண்டவர். எதையும் உரிமையோடு பளிச்சென பேசுபவர். என்ன நடந்தாலும் நான் தியாகத்தின் பக்கம், உண்மையின் பக்கமே நிற்பேன் என்று உறுதிபடச் சொல்லி இறுதிவரை கழகத்தின் மீது அளப்பரிய அன்பு கொண்டிருந்தார்.
புனிதப் போரின் தளபதி
துரோகத்திற்கு எதிராக நாம் நடத்தி வருகிற புனிதப் போரில் ஒரு தளபதியாக நம்மோடு களத்தில் நின்றவர். வெற்றி... வெற்றி.. என வாய் நிறைய அழைத்து இனி யாரிடம் பேசப்போகிறோம் என்று நினைக்கிற போதே எதற்காகவும் கலங்காத என் உள்ளம் கலங்கித் தவிக்கிறது. வெற்றிவேல் மறைவு அமமுகவுக்கும் தனிப்பட்ட முறையில் எனக்கும் ஈடு செய்ய முடியாத பேரிழப்பு. அவரது மறைவால் வாடும் குடும்பத்துக்கும் கழகத்துக்கும் ஆறுதல் சொல்ல வார்த்தைகளின்றி தவிக்கிறேன்.
வெற்றி பெயர் நிலைத்திருக்கும்
நம்முடைய லட்சியப் பயணத்தில் வெற்றிவேல் என்ற பெயர் எப்போதும் நிலைத்திருக்கும். அவரது ஆன்மா இறைவன் திருவடி நிழலில் இளைப்பாற வேண்டுகிறேன். இவ்வாறு டிடிவி தினகரன் கூறியுள்ளார்.
அரைக் கம்பத்தில் அமமுக கொடிகள்
மேலும் தினகரன் மீது மாறாத பற்றுக்கொண்ட அன்பு நண்பராகவும், தளபதியாகவும் திகழ்ந்த வெற்றிவேல் மறைவையொட்டி அமமுக கொடிகள் அனைத்தும் ஒருவாரத்திற்கு அரைக்கம்பத்தில் பறக்கவிடப்பட்டு துக்கம் அனுஷ்டிக்கப்படுகிறது. கழக நிகழ்ச்சிகள் அனைத்தும் ஒரு வாரத்திற்கு ரத்து செய்யப்படுகின்றன என அமமுக தலைமையகத்தின் அறிக்கையில் தெரிவிக்கப்பட்டுள்ளது.