பெரும்பான்மை கிடைக்காவிட்டால் பாஜக மலைபோல் நம்பும் தென்மாநில கட்சிகள்... லிஸ்ட்டில் திமுகவும்!

டெல்லி: லோக்சபா தேர்தலில் பெரும்பான்மை கிடைக்காத நிலையில் தெலுங்கானா ராஷ்டிரிய சமிதி, ஒய்.எஸ்.ஆர். காங்கிரஸ் ஆகியவற்றின் ஆதரவை பாஜக கேட்கும் முடிவில் இருக்கிறது. திமுகவிடமும் பாஜக ஆதரவை கேட்கக் கூடும் என்கின்றன டெல்லி தகவல்கள்.

கடந்த தேர்தலில் 282 தொகுதிகளைப் பெற்று பாஜக தனிப்பெரும்பான்மையுடன் ஆட்சி அமைத்தது. ஆனால் இம்முறை நிச்சயம் பாஜகவுக்கு இத்தனை இடங்கள் கிடைக்காது என்பதே பெரும்பாலான கருத்து கணிப்புகளின் முடிவுகள்.

உ.பி. கூட்டணி

மத்தியில் யார் ஆட்சி அமைக்கப் போகிறார்கள் என்பதை தீர்மானிக்கும் உத்தரப்பிரதேசத்தில் எதிரும் புதிருமாக இருந்த பகுஜன் சமாஜ் - சமாஜ்வாதி கட்சிகள் கூட்டணி அமைத்து தேர்தல் களத்தில் நிற்கின்றன. இதனால் பாஜகவுக்கு உத்தரப்பிரதேசத்தில் பின்னடைவு ஏற்படுவதை தவிர்க்க முடியாது.

பாஜக ப்ளான்

இதனால் பெரும்பான்மைக்கு தேவையான இடங்களைப் பாஜகவால் பெற இயலாமல் போகும் என்பது யதார்த்தம். அப்படி ஒரு சூழ்நிலை வரும் நிலையில் தெலுங்கானா ராஷ்டிரிய சமிதி, ஒய்.எஸ்.ஆர். காங்கிரஸ், பிஜூ ஜனதா தளம் ஆகிய கட்சிகளின் ஆதரவை பாஜக கோர திட்டமிட்டுள்ளது.

திமுக ஆதரவை கோரும் பாஜக

தேவைப்பட்டால் திமுகவின் ஆதரவையும் பாஜக கேட்கும் முடிவில் இருக்கிறது. இந்த 4 கட்சிகளும்தான் திட்டவட்டமான பாஜக எதிர்ப்பை வெளிப்படுத்தவில்லை. மோடிக்கு பதிலாக வேறு ஒருவரை பாஜக பிரதமராக முன்மொழிந்தால் திமுக உள்ளிட்ட கட்சிகள் ஆதரிக்க வாய்ப்பு இருக்கின்றன.

எதிர்க்கட்சிகள் லிஸ்ட்

திரிணாமுல் காங்கிரஸ், பகுஜன் சமாஜ், சமாஜ்வாதி, ஆம் ஆத்மி ஆகியவை பாஜக எதிர்ப்பில் உறுதியாக இருக்கின்றன. இதனால் இக்கட்சிகளின் ஆதரவை பாஜக நிச்சயம் கேட்கப் போவதில்லை என்கின்றன டெல்லி வட்டாரங்கள்.

English summary

According to the sources, BJP may seek DMK support to form the Govt.