Just In

மோடியின் 70வது பிறந்த நாள்... முதல்வர் எடப்பாடி, ராகுல், ஸ்டாலின் உள்ளிட்ட தலைவர்கள் வாழ்த்து

Updated: Thursday, September 17, 2020, 11:25 [IST]

டெல்லி: பிரதமர் மோடியின் 70-வது பிறந்த நாளை முன்னிட்டு அவருக்கு ஜனாதிபதி ராம்நாத் கோவிந்த், காங்கிரஸ் மூத்த தலைவர் ராகுல் காந்தி, தமிழக முதல்வர் எடப்பாடி பழனிசாமி, திமுக தலைவர் மு.க.ஸ்டாலின் உள்ளிட்டோர் வாழ்த்து தெரிவித்தனர்.

பிரதமர் நரேந்திர மோடியின் 70வது பிறந்த நாள் இன்று பாஜகவினரால் நாடு முழுவதும் கொண்டாடப்படுகிறது. மிக எளிய குடும்பத்தில் பிறந்து குஜராத் முதல்வராகவும் நாட்டின் பிரதமராகவும் உயர்ந்தவர் நரேந்திர மோடி.

நள்ளிரவில் டெல்லி கேட்

மோடியின் 70-வது பிறந்த நாள் கொண்டாட்டங்கள் நள்ளிரவு முதலே களைகட்டிவிட்டன. டெல்லி இந்தியா கேட் பகுதியில் நள்ளிரவில் பாஜகவினர் மோடியின் பிறந்த நாளை இனிப்புகள் வழங்கி கொண்டாடி மகிழ்ந்தனர். தமிழகத்திலும் நேற்றே கோவையில் 70 கிலோ லட்டு தயாரிக்கப்பட்டு பொதுமக்களுக்கு விநியோகிக்கப்பட்டது. பிரதமர் மோடிக்கு அரசியல் தலைவர்கள் பிறந்த நாள் வாழ்த்துகளைத் தெரிவித்து வருகின்றனர். மோடியின் பிறந்த நாளை முன்னிட்டு பல்வேறு நலத் திட்டப் பணிகளையும் பாஜகவினர் மேற்கொண்டும் வருகின்றனர்.

ஜனாதிபதி ராம்நாத் கோவிந்த்

மோடிக்கு ஜனாதிபதி ராம்நாத் கோவிந்த் தெரிவித்துள்ள வாழ்த்து: இந்திய வாழ்வியலுக்கும் , இந்திய ஜனநாயக பாரம்பரியத்துக்கும் நீங்கள் ஒரு லட்சியத்துடன் கூடிய விசுவாசம், மதிப்புகள் வழங்கிக் கொண்டிருக்கிறீர்கள். கடவுள் உங்களை எப்போதும் ஆரோக்கியமாகவும் மகிழ்ச்சியாகவும் வைத்திருக்க வேண்டும். தேசம் தொடர்ந்து உங்கள் விலைமதிப்பற்ற சேவைகளைப் பெறுவதற்கு எனது வாழ்த்துகள் மற்றும் பிரார்த்தனைகள். இவ்வாறு ராம்நாத் கோவிந்த் வாழ்த்தியுள்ளார்.

ராகுல், எடப்பாடி, ஸ்டாலின்

பிரதமர் மோடிக்கு காங்கிரஸ் மூத்த தலைவர் ராகுல் காந்தி வாழ்த்து தெரிவித்துள்ளார். இதேபோல் தமிழக முதல்வர் எடப்பாடி பழனிசாமி, துணை முதல்வர் ஓபிஎஸ், திமுக தலைவர் மு.க.ஸ்டாலின் உள்ளிட்டோரும் மோடிக்கு வாழ்த்து கூறியுள்ளனர். தமிழக பாரதிய ஜனதா கட்சியினரும் மோடியின் பிறந்த நாளை பல்வேறு நிகழ்ச்சிகள் மூலம் கொண்டாடி வருகின்றனர்

டாக்டர் ராமதாஸ் வாழ்த்து

பாமக நிறுவனர் டாக்டர் ராமதாஸ் தமது ட்விட்டர் பக்கத்தில் பிரதமர் மோடிக்கு வாழ்த்து கூறியுள்ளார். அவரது வாழ்த்து செய்தி: 70 ஆவது பிறந்தநாள் காணும் பிரதமர் நரேந்திர மோடி (@narendramodi )அவர்கள் அனைத்து நலன்கள் மற்றும் வளங்களுடன் நூற்றாண்டு கடந்து ஆரோக்கியமாக வாழ வாழ்த்துகிறேன். பொது வாழ்வில் மக்களின் விருப்பங்களை நிறைவேற்றி சாதனைகளை படைக்க வாழ்த்துகள்! இவ்வாறு ராமதாஸ் கூறியுள்ளார்.