கணினி முதல் சினிமா டிக்கெட் வரை.. ஜிஎஸ்டி வரியில் அதிரடி குறைப்பு.. 117 பொருட்களின் விலை மாற்றம்!
டெல்லியில் நடந்த ஜிஎஸ்டி கவுன்சில் கூட்டத்தில், 117 பொருட்கள் மீதான ஜிஎஸ்டி வரி குறைக்கப்பட்டுள்ளது.
டெல்லி: டெல்லியில் நடந்த ஜிஎஸ்டி கவுன்சில் கூட்டத்தில், மொத்தம் 117 பொருட்கள் மீதான ஜிஎஸ்டி வரி குறைக்கப்பட்டுள்ளது.
கடந்த வருடம் ஜூலை மாதம் 1ம் தேதி ஜிஎஸ்டி வரி அமல்படுத்தப்பட்டது. இதன் காரணமாக நிறைய பொருட்களின் விலை ஏறியது, சில பொருட்களின் விலை குறைந்தது.
மொத்தம் 5%, 12%, 18%, 28% என்று நான்கு விதமான வெவ்வேறு வரிகள் இதில் விதிக்கப்பட்டது. இந்த வரி விதிப்பை கண்காணிக்கவும், இது குறித்து ஆலோசிக்கவும் ஜிஎஸ்டி கவுன்சில் என்ற அமைப்பு உருவாக்கப்பட்டது.
நேற்று நடந்தது
இந்த நிலையில் நேற்று இந்த ஜிஎஸ்டி கவுன்சில் கூட்டம் நடந்தது. மத்திய நிதியமைச்சர் அருண் ஜேட்லி தலைமையில் இந்த கூட்டம் நடந்தது. தமிழகம் சார்பாக அமைச்சர் ஜெயக்குமார் இதில் கலந்து கொண்டார்.
வரி குறைக்கப்பட்டது
இந்த ஜிஎஸ்டி கவுன்சில் கூட்டத்தில், மொத்தம் 117 பொருட்களின் மீதான வரி குறைக்கப்பட்டது. 7 பொருட்கள் மீதான ஜிஎஸ்டி 28%ல் இருந்து 18% ஆக குறைக்கப்பட்டது. 26 பொருட்கள் மீதான ஜிஎஸ்டி 12%ல் இருந்து 5% ஆக குறைக்கப்பட்டது. அதேபோல் ஜிஎஸ்டி வரிக்கான வருடாந்திர கணக்குகளை தாக்கல் செய்யும் இறுதி நாள் மார்ச் 31-யில் இருந்து ஜூலை 1ம் தேதிக்கு மாற்றப்பட்டது.
எந்த பொருட்கள் எல்லாம்
அத்தியாவசிய பொருட்கள் பலவற்றின் விலை இதனால் குறைந்துள்ளது. விமான கட்டணம் 5 சதவிகிதம் குறைந்துள்ளது. சாக்லேட், பால் உள்ளிட்ட பொருட்களின் விலை குறைந்துள்ளது. பிரதமரின் ஜன்தன் யோஜானா வங்கி கணக்குகளுக்கான வரி நீக்கப்பட்டு இருக்கிறது. மாற்றுத்திறனாளிகளின் வாகனங்கள் மீதான வரி 5% குறைந்துள்ளது.
குறைந்தது
அதேபோல் டிவி, கணினினு ஆகியவற்றின் வரி 28ல் இருந்து 18%ஆக குறைந்துள்ளது. பவர் பேங்க், வாகன டயர், இசைக்கருவிகள் ஆகியவற்றின் விலையும் குறைந்துள்ளது. அதேபோல் சினிமா டிக்கெட் விலையும் குறைக்கப்பட்டுள்ளது. 100 ரூபாய்க்கும் அதிகமான சினிமா டிக்கெட் வரி 28% இருந்து 18% ஆக குறைந்துள்ளது. 100 ரூபாய்க்கும் குறைவான சினிமா டிக்கெட் வரி 18% இருந்து 12% ஆக குறைந்துள்ளது.