மறைந்த முன்னாள் முதல்வர் எம்.ஜி.ஆர். 104-வது பிறந்த நாள்.. ட்விட்டரில் பிரதமர் மோடி புகழ் வணக்கம்
டெல்லி: மறைந்த முன்னாள் தமிழக முதல்வர் எம்.ஜி.ஆரின் 104-வது பிறந்த நாளை முன்னிட்டு ட்விட்டரில் பிரதமர் மோடி புகழ் வணக்கம் செலுத்தி உள்ளார்.
Recommended Video
தமிழக சட்டசபை தேர்தல் நெருங்கும் நிலையில் எம்.ஜி.ஆர். மீண்டும் பேசுபொருளாகி இருக்கிறார். தாம் எம்ஜிஆரின் நீட்சி என்று மக்கள் நீதி மய்யத்தின் தலைவர் நடிகர் கமல்ஹாசன் கூறி வருகிறார்.
பாரதிய ஜனதா கட்சியும் எம்ஜிஆரை கையில் எடுத்துக் கொண்டு செயல்படுகிறது. அதிமுக நிகழ்வுகளில் இதுவரை ஜெயலலிதா படம் மட்டுமே இடம்பெற்றிருந்த நிலையில் தற்போது எம்ஜிஆரும் இடம்பெற்று வருகிறார்.
இந்த நிலையில் எம்ஜிஆரின் 104-வது பிறந்த நாள் இன்று தமிழகம் முழுவதும் கொண்டாடப்பட்டது. சென்னையில் அதிமுக தலைமை அலுவலகத்தில் எம்ஜிஆர் சிலைக்கு முதல்வர் எடப்பாடி பழனிசாமி, துணை முதல்வர் ஓ. பன்னீர்செல்வம் ஆகியோர் மாலை அணிவித்து மரியாதை செலுத்தினர்.
பிரதமர் நரேந்திர மோடியும் தமது ட்விட்டர் பக்கத்தில் எம்ஜிஆருக்கு தமிழில் புகழ் வணக்கம் செலுத்தி உள்ளார். பிரதமர் மோடி தமது ட்விட்டர் பக்கத்தில், பாரதரத்னா எம்ஜிஆர் பலரது இதயங்களில் வாழ்ந்து கொண்டிருக்கிறார். திரையுலகிலும் அரசியலிலும் அவர் பரவலாக மதிக்கப்பட்டார். அவர் முதலமைச்சராக இருந்தபோது, வறுமையை ஒழிக்கவும் பெண்களுக்கு அதிகாரம் அளிக்கவும் பல முயற்சிகளைத் தொடங்கினார். அவரது பிறந்தநாளில் எம்ஜிஆருக்கு எனது புகழ் வணக்கம் என்று பதிவிட்டுள்ளார்.