ஸ்பைஸ்ஜெட் விமானத்தின் டாய்லெட்டில் மறைத்து வைக்கப்பட்ட 1 கிலோ தங்கக் கட்டிகள்
கொச்சி: துபாயில் இருந்து கொச்சி வந்த ஸ்பைஸ்ஜெட் விமானத்தின் கழிவறையில் 1 கிலோ தங்கக் கட்டிகள் மறைத்து வைக்கப்பட்டிருந்தது கண்டுபிடிக்கப்பட்டுள்ளது.
ஸ்பைஸ்ஜெட் விமானம் எஸ்.ஜி.18 கடந்த செவ்வாய்க்கிழமை துபாயில் இருந்து கொச்சிக்கு கிளம்பியது. விமானத்தில் இருந்த பயணி ஒருவர் அடிக்கடி கழிவறைக்கு சென்றுள்ளார். இது விமான சிப்பந்திகளுக்கு சந்தேகத்தை ஏற்படுத்தியது.
விமானம் கொச்சி விமான நிலையத்தில் தரையிறங்கியும் அந்த குறிப்பிட்ட பயணி சந்தேகத்திற்கு இடமாகவே நடந்துள்ளார். இதையடுத்து சிப்பந்தி ஒருவர் கழிவறைக்கு சென்று சோதனை செய்ததில் அங்கு செய்தித்தாள்களில் சுற்றி மறைத்து வைக்கப்பட்டிருந்த 1 கிலோ தங்கக் கட்டிகளை கண்டுபிடித்தார்.
இதையடுத்து விமான சிப்பந்திகள் அந்த பயணியை பிடித்து சுங்கத்துறை அதிகாரிகளிடம் ஒப்படைத்தனர். மேலும் தங்கக் கட்டிகளையும் அவர்கள் சுங்கத்துறை அதிகாரிகளிடம் ஒப்படைத்தனர்.
பயணி ஒருவர் ஒரு கிலோ தங்கத்தை கடத்தி வந்தது சக பயணிகளை அதிர்ச்சி அடைய வைத்தது.