உன்னதமான இந்தியாவின் புதிய தூதராக நடிகர் அமிதாப் பச்சன் நியமிக்கப்பட வாய்ப்பு !
டெல்லி: இந்திய சுற்றுலாத்துறையை பிரபலப்படுத்தும் நோக்கில் உன்னதமான இந்தியா (incredible india) என்ற பிரச்சார திட்டம் செயல்படுத்தப்பட்டு வருகிறது. அதன் புதிய தூதராக பாலிவுட் சூப்பர் ஸ்டார் அமிதாப் பச்சன் நியமிக்கப்பட வாய்ப்பு இருப்பதாக தகவல்கள் தெரிவிக்கின்றன.
இந்திய சுற்றுலாத்துறையை மேம்படுத்தும் வகையில் 'உன்னதமான இந்தியா' என்ற திட்டம் கடந்த 10 ஆண்டுகளாக செயல்படுத்தப்பட்டு வருகிறது. இதன் விளம்பர தூதராக பிரபல பாலிவுட் நடிகர் ஆமிர்கான் செயல்பட்டு வந்தார். இந்நிலையில் சுற்றுலாத் துறையின் தூதர் பொறுப்பில் இருந்து ஆமிர்கானை சுற்றுலாத்துறை அமைச்சகம் நீக்கிவிட்டதாக தகவல்கள் வெளியாகி பெரும் பரபரப்பை ஏற்படுத்தியது.
இதையடுத்து மத்திய சுற்றுலாத் துறை அமைச்சர் மகேஷ் சர்மா பி.டி.ஐ. செய்தி நிறுவனத்திற்கு அளித்துள்ள பேட்டியில், உன்னதமான இந்தியா திட்டத்திற்காக விளம்பர நிறுவனமான மெக்கேன் எரிக்சன் நிறுவனத்துடன் போடப்பட்ட ஒப்பந்தம் முடிவுக்கு வந்துவிட்டது. எனவே விளம்பர தூதராக செயல்பட்டுவந்த ஆமிர்கான் ஒப்பந்தமும் முடிவுக்கு வந்துவிட்டது என்று கூறியிருந்தார்.
இந்நிலையில் உன்னதமான இந்திய திட்டத்தின் புதிய விளம்பர தூதராக பாலிவுட் சூப்பர் ஸ்டார் அமிதாப் பச்சன் நியமிக்கப்பட அதிக வாய்ப்பு உள்ளதாக செய்திகள் வெளியாகியுள்ளன.
ஒருவேளை அமிதாப் பச்சன் மறுப்பு தெரிவித்தால் நடிகர் அக்சய்குமார், நடிகைகள் தீபிகா படுகோன்,பிரியங்கா சோப்ரா ஆகியோரில் யாராவது ஒருவர் நியமிக்கப்படலாம் என்றும் கூறப்படுகிறது. மோடி குஜராத் முதல்வராக பதவி வகித்த போது அம்மாநில சுற்றுலா வளர்ச்சித் துறையின் தூதராக அமிதாப் பச்சன் நியமிக்கப்பட்டது குறிப்பிடத்தக்கது.