உடற்பயிற்சி செய்கையில் கீழே விழுந்து சந்திரபாபு நாயுடுவின் மனைவிக்கு எலும்பு முறிவு
ஹைதராபாத்: வீட்டில் உடற்பயிற்சி செய்கையில் தவறி கீழே விழுந்த ஆந்திர முதல்வர் சந்திரபாபு நாயுடுவின் மனைவி புவனேஸ்வரியின் வலது கை மணிக்கட்டில் எலும்பு முறிவு ஏற்பட்டது.
ஆந்திர முதல்வர் சந்திரபாபு நாயுடுவின் மனைவி புவனேஸ்வரி. அவர் திங்கட்கிழமை காலை தனது வீட்டில் உடற்பயிற்சி செய்துள்ளார். டிரெட்மில்லில் நடந்து கொண்டிருக்கையில் அவர் கால் தவறி கீழே விழுந்தார். இதில் அவரின் வலது கை மணிக்கட்டில் எலும்பு முறிவு ஏற்பட்டது.
இதையடுத்து ஹைதராபாத்தில் உள்ள அப்பல்லோ மருத்துவமனைக்கு அவரை அழைத்துச் சென்றனர். மருத்துவமனையில் அனுமதிக்கப்பட்டுள்ள அவருக்கு டாக்டர்கள் தீவிர சிகிச்சை அளித்தனர். அவர் இன்று மருத்துவமனையில் இருந்து வீடு திரும்புவார் என்று தெரிவிக்கப்பட்டுள்ளது.
சந்திரபாபு நாயுடு, அவரது மகன் லோகேஷ் மற்றும் குடும்பத்தினர் மருத்துவமனைக்கு சென்று புவனேஸ்வரியை சந்தித்து நலம் விசாரித்தனர். நடைபயிற்சிக்கு வெளியே சென்ற காலம் மெல்ல மெல்ல மலையேறி வருகிறது.
மக்கள் வீடுகளிலேயே டிரெட்மில் வைத்து நடக்க ஆரம்பித்துவிட்டனர். புவனேஸ்வரியும் அவ்வாறு டிரெட்மில்லை தான் பயன்படுத்தி வருகிறார்.