“கிட்னியை வித்து தான் தங்கச்சி கல்யாணம் பண்ணனும்”.. சினிமா மாதிரியே நிஜத்திலேயும் இப்டி ஒரு அண்ணனா?
தங்கைக்கு திருமணம் செய்து வைக்க உடல் உறுப்புகளை விற்கும் நிலைக்கு அண்ணன் சென்றது பரபரப்பை ஏற்படுத்தியுள்ளது.
சித்தூர்: ஆந்திராவில் தங்கைக்கு திருமணம் செய்து வைப்பதற்காக தன் உடல் உறுப்புகளை விற்பனை செய்ய இளைஞர் ஒருவர் அனுமதி கேட்ட சம்பவம் பரபரப்பை ஏற்படுத்தியுள்ளது.
நகைச்சுவையாக, 'இனி கிட்னியை வித்துத்தான் கல்யாணம் பண்ணனும்’ எனச் சொல்லக் கேட்டிருப்போம். ஆனால் நிஜமாகவே தங்கையில் திருமணத்திற்காக தன் உடல் உறுப்புகளை விற்பனை செய்ய இளைஞர் ஒருவர் முடிவெடுத்த சம்பவம் ஆந்திராவில் நடந்துள்ளது.
ஆந்திர மாநிலம் சித்தூர் மாவட்டத்தில் உள்ள மதனபள்ளியைச் சேர்ந்த இளைஞர் பாவா ஜான். பெற்றோரை இழந்த இவர் தனது தங்கையும் தனியே வசித்து வருகிறார். இந்நிலையில் திருமண வயதை எட்டிய தன் தங்கைக்கு ஊர் மெச்ச திருமணம் செய்து வைக்க விரும்பியுள்ளார் பாவா ஜான்.
ஆனால், அதற்குத் தேவையான பணம் அவரிடம் இல்லை. எனவே அதிரடியாக தனது உடல் உறுப்புகளை விற்று தங்கைக்கு திருமணம் செய்து வைப்பது என அவர் முடிவெடுத்தார். இதனை சட்டப்படி செய்ய நினைத்த பாவா ஜான், மக்கள் குறைகேட்கும் கூட்டத்தில் கலந்து கொண்ட துணை ஆட்சியர் கீர்த்தியிடம் தனது கோரிக்கையை முன்வைத்தார்.
இதனைக் கேட்டு ஆச்சரியமும், அதிர்ச்சியும் அடைந்த துணை ஆட்சியர் கீர்த்தி, பாவா ஜானுக்கு உரிய அறிவுரை கூறி அனுப்பி வைத்தார். இது தொடர்பான வீடியோ இணையத்தில் வைரலாகியுள்ளது.
சமூகவலைதளங்களில், 'இப்படி ஒரு அண்ணனா?’ என நெட்டிசன்கள் ஒருபுறம் நெகிழ்ந்தாலும், 'இதெல்லாம் டூ மச்..’ என கிண்டலடித்தும் பதிவுகளை வெளியிட்டு வருகின்றனர்.