ஏப்ரலில் 2வது முறையாக பெட்ரோல், டீசல் விலை குறைப்பு: நள்ளிரவு முதல் அமல்
டெல்லி: பெட்ரோலின் விலை லிட்டருக்கு 80 பைசாவும், டீசலின் விலை லிட்டருக்கு ரூ.1.30ம் குறைக்கப்பட்டுள்ளது. இந்த புதிய விலை இன்று நள்ளிரவு முதல் அமலுக்கு வருகிறது.
சர்வதேச சந்தையில் கச்சா எண்ணெய்யின் விலை குறைந்துள்ளது. இதையடுத்து எண்ணெய் நிறுவனங்கள் பெட்ரோல் விலையை லிட்டருக்கு 80 பைசாவும், டீசல் விலையை லிட்டருக்கு ரூ.1.30ம் குறைத்து அறிவிப்பு வெளியிட்டுள்ளது.
இந்த விலை குறைப்பு இன்று நள்ளிரவு அமலுக்கு வருகிறது. இத்துடன் இந்த மாதத்தில் மட்டும் இரண்டு முறை பெட்ரோல், டீசல் விலை குறைக்கப்பட்டுள்ளது என்பது குறிப்பிடத்தக்கது.
முன்னதாக இந்த மாத துவக்கத்தில் பெட்ரோல் விலை லிட்டருக்கு 49 பைசாவும், டீசல் விலை லிட்டருக்கு ரூ.1.21ம் குறைக்கப்பட்டது. சர்வதேச சந்தையில் கச்சா எண்ணெய்யின் விலை தொடர்ந்து சரிந்து வருவதால் பெட்ரோல், டீசல் விலை தொடர்ந்து குறைக்கப்பட்டு வருகிறது.
பெட்ரோல், டீசல் விலை குறைந்து வருவதால் மக்கள் மகிழ்ச்சி அடைந்துள்ளனர்.
இதன்படி டெல்லியில் ஒரு லிட்டர் பெட்ரோல் விலை ரூ 59.20 பைசாவாகவும், ஒரு லிட்டர் டீசல் விலை ரூ47.20 பைசாவாகவும் இனி விற்பனை செய்யப்படும்.