Just In

குஜராத்: 6 தொகுதிகளில் பாஜக, காங்கிரஸ் சம இடங்களில் முன்னிலை

Updated: Thursday, October 24, 2019, 14:16 [IST]

குஜராத்: ஓபிசி தலைவர் பாஜகவின் அல்பேஷ் தாக்கூர் தோல்வி முகம்- 6 தொகுதிகளில் 3-ல் காங். முன்னிலை

அகமதாபாத்: குஜராத்தில் 6 சட்டசபை தொகுதிக்கான இடைத்தேர்தலில் பாஜக 3 இடங்களில் முன்னிலை வகிக்கிறது. காங்கிரஸ் 3 இடங்களைக் கைப்பற்றும் நிலை உள்ளது.

குஜராத் மாநிலத்தில் ரதன்பூர், பயாட், அம்ராய்வாதி, லுனாவாடா, கேரலூ, தாரட் ஆகிய 6 சட்டசபை தொகுதிகளுக்கான இடைத்தேர்தல் நடைபெற்றது. இதில் ரன்பூர், பயாட் 2 தொகுதிகளில் காங்கிரஸும் எஞ்சிய தொகுதிகளில் பாஜகவும் முன்னிலையில் உள்ளன.

அல்பேஷ் தாக்கூர்

ரதன்பூர் தொகுதியில் காங்கிரஸில் இருந்து பாஜகவுக்கு தாவிய ஓபிசி தலைவர் அல்பேஷ் தாக்கூர் போட்டியிட்டார். இத்தொகுதியில் 2017-ம் ஆண்டு காங்கிரஸ் வேட்பாளராக போட்டியிட்ட அல்பேஷ் தாக்கூர் 85,777 வாக்குகள் பெற்று அமோக வெற்றியைப் பெற்றார். லோக்சபா தேர்தலுக்கு முன்னதாக நடைபெற்ற ராஜ்யசபா தேர்தலில் பாஜகவுக்கு வாக்களித்தார்.

மீண்டும் போட்டி

இதனைத் தொடர்ந்து எம்.எல்.ஏ. பதவியை ராஜினாமா செய்து காங்கிரஸில் இருந்து விலகி பாஜகவில் இணைந்தார் அல்பேஷ். அவருடன் அவரது சகாவும் பயாட் தொகுதி எம்.எல்.ஏ.வுமான தவல்சின் ஜஹாலாவும் பாஜாவுக்கு தாவினர். இந்த இருவருக்கும் அதே தொகுதிகளில் இடைத்தேர்தலில் போட்டியிட பாஜக வாய்ப்பு கொடுத்தது.

பின்னடைவில் அல்பேஷ் தாக்கூர்

ஆனால் இருவருமே தங்களது தொகுதிகளில் பின்னடைவை சந்தித்து வருகின்றனர். தற்போதைய நிலவரப்படி ரதன்பூர் தொகுதியில் அல்பேஷ் தாக்கூர் சுமார் 10,000 வாக்குகள் பின் தங்கி உள்ளார்.

பயாட்டில் பாஜக பின்னடைவு

பயாட் தொகுதியில் தவல்சின் ஜஹாலா சுமார் 3,000 வாக்குகள் பின் தங்கி உள்ளார். இரு தொகுதிகளிலுமே காங்கிரஸ் முன்னணியில் உள்ளது. இந்த இரு தொகுதிகளிலும் காங்கிரஸ் கட்சியின் செல்வாக்கு மிக்கவை என்பதால் பாஜகவின் முகமாக நின்ற இருவராலும் வெல்ல முடியவில்லை.

அம்ராய்வாதியிலும் பாஜக பின்னடைவு

இதேபோல் அம்ராய்வாதி தொகுதியில் பாஜக வேட்பாளரை விட காங்கிரஸ் வேட்பாளர் பட்டேல் தர்மேந்திரா சாந்திலால் சுமார் 2,000க்கும் அதிகமான வாக்குகள் முன்னிலஇயில் உள்ளார். குஜராத்தின் மொத்தம் 6 தொகுதிகளுக்கான இடைத்தேர்தலில் பாஜக 3; காங்கிரஸ் 3 தொகுதிகளில் முன்னிலை பெற்றுள்ளன.