கர்நாடக முதல்வர் சித்தராமையா அணிந்துள்ள வாட்ச் மதிப்பு ரூ.70 லட்சம்?
பெங்களூர்: கர்நாடக முதல்வர் சித்தராமையா அணிந்துள்ள கைக்கடிகாரத்தின் மதிப்பு ரூ.70 லட்சம் என்று மதசார்பற்ற ஜனதாதள கட்சியின் மாநில தலைவர் ஹெச்.டி.குமாரசாமி குற்றம்சாட்டியுள்ளார்.
இதுபற்றி குமாரசாமி கூறுகையில், சித்தராமையா அணிந்துள்ள கைக்கடிகாரத்தின் விலை ரூ.68,56,000 ஆகும். சுங்க வரியையும் சேர்த்து பார்த்தால் அதன் மதிப்பு ரூ.70 லட்சம் இருக்கும்.
ஹுப்லோட் நிறுவனத்தின் தயாரிப்பான இந்த வாட்சில், வைர கற்கள் பதிக்கப்பட்டுள்ளன. சமீப காலமாகத்தான் இந்த கடிகாரத்தை சித்தராமையா அணிந்துள்ளார். சித்தராமையா எத்தனை லட்சத்திற்கு வாட்ச் அணிந்திருந்தாலும் நான் கவலைப்பட போவதில்லை. ஆனால், ராம் மனோகர் லோகியா போன்ற சமூகவாதியை பின்பற்றுபவன் என்று தன்னைத்தானே அழைத்துக்கொள்ளும் சித்தராமையா, இத்தனை லட்சம் ரூபாய் மதிப்பில் வாட்ச் அணிவது சரியா?
சித்தராமையா அந்த வாட்சை அணிவதும், சில்க் சட்டை அணிவதுமான வீடியோக்கள் என்னிடம் உள்ளன. வாட்ச் விலையை தெரிந்துகொள்ள, அதன் போட்டோவை துபாய்க்கு அனுப்பி, உறுதி செய்துள்ளேன். இவ்வாறு குமாரசாமி தெரிவித்தார்.
இதனிடையே, குற்றச்சாட்டை மறுத்துள்ள சித்தராமையா, "குமாரசாமி அந்த வாட்சுக்கு ரூ.10 லட்சம் கொடுத்தால் கூட போதும், நான் அதை விற்பனை செய்ய தயாராக உள்ளேன்" என்று தெரிவித்துள்ளார்.