லாலுவின் டெல்லி ஆபிஸ் வாடகை 15 வருஷமா “333 ரூபாய்” – இந்த லட்சணத்தில் ஆபிஸ் பேர் “ராப்ரி” யாம்!
டெல்லி: டெல்லியில் லாலு பிரசாத் யாதவின் கட்சி அலுவலகம் வெறும் ரூபாய் 333 வாடகையில் இயங்குகின்றது என்ற செய்தி, தகவல் அறியும் உரிமைச் சட்டத்தின் மூலம் வெளியாகியுள்ளது.
லாலு பிரசாத் யாதவ் தலைமையிலான ராஷ்டிரீய ஜனதா தள கட்சி அலுவலகம் டெல்லியில் உள்ள வி.பி ஹவுஸ் கட்டிடத்தில் இயங்கி வருகிறது.
இந்த கட்டிடத்திற்கான வாடகை குறித்து தகவல் அறியும் உரிமை சட்டத்தின் அடிப்படையில் சமூக ஆர்வலர் சுபாஷ் அகர்வால் என்பவர் கேட்டிருந்தார்.
இதற்கு ஊரக மேம்பாட்டுத்துறை அமைச்சகம் பதில் அளித்து உள்ளது. அதில் கடந்த 2001 ஆம் ஆண்டு ஜூன் 1 ஆம் தேதியில் இருந்து வி.பி ஹவுஸ் கட்டிடத்தில் ராஷ்டிரீய ஜனதா தள அலுவலகம் இயங்கி வருகிறது.
2 அறைகள் கொண்ட இந்த அலுவலகத்துக்கான மாதவாடகை வெறும் ரூபாய் 333 மட்டுமே செலுத்தப்பட்டு வருவதாக குறிப்பிடப்பட்டு உள்ளது.
மிகக் குறைந்த இந்த வாடகையை 15 ஆண்டுகளாக அந்த கட்சி மத்திய அரசின் நகர்ப்புற அபிவிருத்தித் துறைக்கு வழங்கி வருகிறது. இந்த சூட் அறை ஒன்றில் குறைந்தபட்சம் 15 பேர் தங்கலாம்.
இந்த அறைகளுக்கு அருகிலேயே ராஷ்டிரீய ஜனதா தளம் கட்சி கடந்த 2008 ஆம் ஆண்டு டெல்லியில் ராப்ரி பவன் என்ற பெயரில் 3 மாடி கொண்ட தலைமையகத்தை கட்டியபோதும் தொடர்ந்து இந்த வி.பி.ஹவுஸ் கட்டிட அலுவலகத்தையே பயன்படுத்தி வருகிறது. பல முறை நோட்டீஸ் கொடுத்தும் காலி செய்ய லாலு மறுக்கிறார்.
குறைந்த விலைக்கு அரசு வழங்கிய நிலத்தில் கட்டப்பட்ட லாலு கட்சி தலைமை அலுவலகத்திற்கு லாலு பிரசாத் தன் மனைவி ரப்ரி பெயரை வைத்துள்ளார்.