திரிபுராவில் துர்கா பூஜை கொண்டாடும் முஸ்லீம்கள்
அகர்தலா: திரிபுராவில் முஸ்லீம்கள் துர்கா பூஜை கொண்டாடியுள்ளது பலருக்கும் ஆறுதலாக உள்ளது.
திரிபுரா மாநிலம் சிபாஹிஜலா மாவட்டத்தில் உள்ள சோனமுராவில் துர்கா பூஜை நடத்தும் கமிட்டியின் தலைவராரக ஒரு முஸ்லீம் உள்ளார். அவர் தான் பூஜை வேலைகளை கவனித்து வருகிறார்.
இது குறித்து துர்கா பூஜை கமிட்டியின் தலைவர் பசீருத்தின் புயான் கூறுகையில்,
இந்துக்கள் அதிகம் வசிக்கும் இந்த பகுதியில் துர்கா பூஜை கமிட்டியின் தலைவராக கடந்த மூன்று ஆண்டுகளாக நான் தேர்வு செய்யப்பட்டுள்ளேன். என் குழந்தை பருவத்தில் இருந்து துர்கா பூஜையில் பங்கேற்று வருகிறேன். இது இந்துக்களின் பூஜை என்று நான் நினைத்தது இல்லை.
நாங்கள் பூஜைக்கு ஏற்பாடு செய்து கூட்டாக அனைவரும் மகிழ்ச்சி அடைகிறோம். துர்கா பூஜை கமிட்டிக்கு ஒரு முஸ்லீம் எப்படி தலைவராக இருக்க முடியும் என்று இதுவரை என்னிடம் யாரும் கேட்டது இல்லை என்றார்.
துர்கா பூஜை நடத்தும் கமிட்டி உறுப்பினரான பிஜோய் ராய் கூறுகையில்,
இங்கு பல்வேறு இடங்களில் துர்கா பூஜைக்கு முஸ்லீம்கள் தான் ஏற்பாடு செய்கிறார்கள். இது இந்துக்களுக்கு மட்டும் அல்ல அனைவருக்குமான பூஜை என்று நாங்கள் நினைப்பதால் தான் முஸ்லீம்கள் பூஜைக்கு ஏற்பாடு செய்கிறார்கள் என்றார்.