அகில இந்திய மகளிர் காங்கிரஸ் பொதுச் செயலாளர் ஆனார் நடிகை நக்மா
டெல்லி: அகில இந்திய மகளிர் காங்கிரஸ் பொதுச் செயலாளராக நடிகை நக்மா நியமிக்கப்பட்டுள்ளார்.
கோலிவுட், டோலிவுட், பாலிவுட், போஜ்புரி படங்களில் நடித்துள்ளவர் நக்மா. ஆன்மீகத்தில் ஈடுபட்டிருந்த நக்மா அரசியல் பக்கம் சென்று காங்கிரஸ் கட்சியில் சேர்ந்தார். அவர் தேர்தல் நேரங்களில் கட்சியின் வேட்பாளர்களுக்காக தீவிர பிரச்சாரம் செய்து வருகிறார். கடந்த லோக்சபா தேர்தலில் காங்கிரஸ் சார்பில் போட்டியிட்டார்.
இந்நிலையில் அகில இந்திய மகளிர் காங்கிரஸ் பொதுச் செயலாளராக நக்மா நியமிக்கப்பட்டுள்ளார். அவரது பெயரை பரிந்துரை செய்ததை காங்கிரஸ் துணை தலைவர் ராகுல் காந்தி ஏற்றுக் கொண்டார்.
முன்னாள் மத்திய அமைச்சர் வர்ஷா கெய்க்வாட் உள்பட 11 பேரின் பெயர்கள் பொதுச் செயலாளர் பட்டியலில் இடம்பெற்றிருந்தது. டெல்லி மகளிர் காங்கிரஸ் தலைவராக டெல்லி மகளிர் ஆணைய தலைவராக இருந்த பர்கா சுக்லா சிங் நியமிக்கப்பட்டுள்ளார். அகில இந்திய மகளிர் காங்கிரஸ் செயலாளர்களாக 9 பேர் நியமிக்கப்பட்டுள்ளார்கள்.
மகளிர் காங்கிரஸ் நிர்வாகிகள் நியமன பட்டியலுக்கு ராகுல் ஒப்புதல் அளித்துள்ளது இதுவே முதல் முறை ஆகும். வழக்கமாக இந்த பட்டியல் காங்கிரஸ் தலைவர் சோனியா காந்தியின் ஒப்புதலின்பேரில் தான் வெளியிடப்படும் என்பது குறிப்பிடத்தக்கது.