ஓமைகாட்!: ஆட்டுச் சந்தையில் விற்பனைக்கு வந்த சல்மான் கான், ஷாருக்கான்
லக்னோ: உத்தர பிரதேசத்தில் பக்ரீத் பண்டிகையையொட்டி ஆட்டு சந்தையில் விற்பனைக்கு வந்த இரண்டு ஆடுகளின் பெயர்கள் அனைவரின் கவனத்தையும் ஈர்த்துள்ளது.
உத்தர பிரதேச மாநிலத்தில் நாளை பக்ரீத் பண்டிகை கொண்டாடப்படுகிறது. இதையொட்டி அம்மாநிலத்தில் உள்ள ஆட்டுச் சந்தைகளில் வியாபாரம் படுஜோராக நடந்து வருகிறது. இந்நிலையில் லக்னோவில் உள்ள ஆட்டுச் சந்தைகளில் விற்கப்படும் ஆடுகளுக்கு பிரபல நடிகர்களின் பெயர்கள் வைக்கப்பட்டுள்ளது.
குண்டாக பெரியதாக இருக்கும் ஆட்டிற்கு சல்மான் கான் எனவும், கருப்பு நிற ஆடு ஒன்றுக்கு ஷாருக்கான் என்றும் பெயர் வைத்துள்ளனர். பிரபலங்களின் பெயர் வைக்கப்பட்டுள்ள ஆடுகள் ரூ.15 ஆயிரம் முதல் ரூ. 1 லட்சம் வரை விற்பனை செய்யப்படுகிறது.
ஆடுகளுக்கு பாலிவுட் நட்சத்திரங்கள் தவிர்த்து பிரபல விளையாட்டு வீரர்களின் பெயர்களையும் வைத்துள்ளனர். ஒரு ஆட்டிற்கு சானியா மிர்சா நினைவாக சானியா என்று பெயர் வைக்கப்பட்டுள்ளது.
ஜம்னாபாரி, தும்பா, அஜ்மீரி வகை ஆடுகளுக்கு தான் படுகிராக்கியாக உள்ளது. சஜித் என்பவர் தான் பார்த்து பார்த்து வளர்த்த 125 கிலோ ஆட்டிற்கு தனக்கு பிடித்த இனிப்பு வகையான பர்ஃபியின் பெயரை வைத்துள்ளார்.
லக்னோவில் உள்ள சதத்கஞ்ச் பகுதியைச் சேர்ந்தவரின் ஆட்டின் உடம்பில் இயற்கையாகவே நட்சத்திரம் மற்றும் நிலா வடிவம் இருப்பதால் அதன் விலை ரூ.2 லட்சம் ஆகும். மேலும் அல்லாஹ் என்ற வார்த்தை உடலில் உள்ள அதிசய ஆட்டின் விலை ரூ.5 லட்சம் ஆகும்.