அய்யோ பாவம், அத்வானிக்கு மக்களவை சபாநாயகர் பதவியும் கிடையாதா?
டெல்லி: பாஜக மூத்த தலைவர் அத்வானி எதிர்பார்த்த மக்களவை சபாநாயகர் பதவி சுமித்ரா மகாஜனுக்கு அளிக்கப்படும் என்று செய்திகள் வெளியாகியுள்ளன.
மோடியின் அமைச்சரவையில் 75 வயதுக்கு மேல் உள்ளவர்களுக்கு இடம் இல்லை என்று அறிவிக்கப்பட்டது. இதையடுத்து 86 வயதாகும் அத்வானிக்கு அமைச்சரவையில் இடம் கிடைக்காமல் போனது.
இந்நிலையில் அத்வானி மக்களவை சபாநாயகர் பதவி தனக்கு அளிக்கப்படும் என்று பெரிதும் எதிர்பார்த்துக் கொண்டிருக்கிறார். ஆனால் அந்த பதவி பாஜக மூத்த தலைவரும், இந்தூரில் இருந்து 8 முறை எம்.பி.யாக தேர்வு செய்யப்பட்டவருமான சுமித்ரா மகாஜனுக்கு அளிக்கப்படும் என்று கூறப்படுகிறது. இந்த செய்தி அத்வானிக்கு பெரும் அதிர்ச்சி அளிப்பதாக இருக்கும்.
மக்களவை சபாநாயகர் பதவிக்கு அத்வானியின் பெயர் பரிசீலிக்கப்படவே இல்லை என்று கூறப்படுகிறது. இதற்கிடையே அட்டர்னி ஜெனரல் பதவிக்கு மூத்த வழக்கறிஞர்களான உதய் லலித் மற்றும் முகுல் ரொஹதோகி ஆகியோரின் பெயர்கள் பரிசீலனையில் உள்ளனவாம்.