அமித்ஷா பங்கேற்ற யோகா நிகழ்ச்சி.. சீனா இறக்குமதி விரிப்புகளுக்காக பொதுமக்கள் அடிதடி
ரோடக்: மத்திய உள்துறை அமைச்சர் அமித்ஷா பங்கேற்ற சர்வதேச யோகா தின நிகழ்ச்சி முடிவடைந்ததும் சீனா இறக்குமதி யோகா விரிப்புகளை அள்ளிக் கொண்டு போவதில் பொதுமக்களிடையே அடிதடி ஏற்பட்டது.
உலகம் முழுவதும் 5-வது சர்வதேச யோகா தின நிகழ்ச்சிகள் இன்று நடைபெற்றன. ராஞ்சியில் பிரதமர் மோடி பங்கேற்றார். ஹரியானாவின் ரோடக்கில் உள்துறை அமைச்சர் அமித்ஷா கலந்து கொண்டு யோகாசனங்களை செய்தார்.
அமித்ஷா உள்ளிட்ட விஐபிக்கள் பங்கேற்பதால் யோகாசன நிகழ்ச்சிக்கு சீனா இறக்குமதி விரிப்புகள் ஏற்பாடு செய்யப்பட்டன. இந்த நிகழ்ச்சி முடிந்ததுதான் தாமதம்.
நிகழ்ச்சியில் கலந்து கொண்டவர் விரிப்புகளை வாரி சுருட்டிக் கொண்டு ஓடுவதில்தான் முனைப்பாக இருந்தனர். ஒருசிலர் மற்றவர்களிடம் இருந்து பறித்து அடிதடியிலும் இறங்கினர்.
இதனால் ரோடக்கில் நிகழ்ச்சி நடைபெற்ற இடம் களேபரமாக காட்சியளித்தது. இது தொடர்பான வீடியோக்களும் சமூக வலைதளங்களில் வைரலாக பரவி வருகின்றன.