அம்மா தேவை, சரியான நபருக்கு ரூ.98 லட்சம்: விளம்பரம் செய்த 32 வயது சீனர்
பெய்ஜிங்: நன்கு படித்த பெண்ணை தனது தாயாக தத்தெடுக்க 32 வயது சீன குடிமகன் திட்டமிட்டுள்ளார். அதற்காக சரியான ஆளுக்கு ரூ.97 லட்சத்து 96 ஆயிரத்து 535 அளிக்க தயாராக உள்ளார்.
சீனாவின் சிஷுவான் மாகாணத்தில் உள்ள ஃபாங்கு பார்க் பகுதியைச் சேர்ந்த 32 வயது நபருக்கு நன்கு படித்த பெண்ணை தனது தாயாக தத்தெடுக்க வேண்டும் என்ற ஆசை ஏற்பட்டது. இதையடுத்து அவர் இது குறித்து விளம்பரம் செய்தார். ஒரு கையில் சிவப்பு லாந்தர்ன் விளக்கு மறுகையில் பெட்டி நிறைய பணத்துடன் போதை பழக்கம் இல்லாத, வெளிநாடுகளுக்கு பயணம் செய்த அனுபவம் உள்ள பெண் தாயாக வேண்டும் என்று விளம்பரம் செய்தார்.
தனக்கு தாயாக வருபவருக்கு குறைந்தது 57 வயதாகி இருக்க வேண்டும் என்று அந்த நபர் தெரிவித்துள்ளார். மேலும் தான் தெரிவித்துள்ள தகுதிகள் உள்ள பெண்ணுக்கு ரூ.97 லட்சத்து 96 ஆயிரத்து 535 அளிக்க தயாராக உள்ளதாக அவர் தெரிவித்துள்ளார்.
இந்த வித்தியாசமான விளம்பரம் சீனாவில் பலரின் கவனத்தை ஈர்த்துள்ளது என்பது குறிப்பிடத்தக்கது.