ரூ. 18 லட்சத்தில்... டிவி, நீச்சல் குளம், ட்ரெட்மில் புடை சூழ உங்கள் ‘பப்பி’யின் கனவு இல்லம் தயார்!
லண்டன்: டிவி. நீச்சல் குளம் உள்ளிட்ட சகல வசதிகளுடன் வடிவமைக்கப்பட்ட நாய்களுக்கான கனவு இல்லத்தை சாம்சங் நிறுவனம் தயாரித்துள்ளது. விலை ஜஸ்ட் ரூ. 18,65,263 தான்.
வீடுகளில் செல்லமாக வளர்க்கப்படும் பிராணிகளில் நாய்கள் முக்கியமானது. மற்ற உயிரினங்களை விட வீட்டிற்கு பாதுகாப்பு தரும் நாய்களை ‘மக்களின் நண்பன்' என்றே அழைக்கின்றனர். இதனாலேயே குடும்ப உறுப்பினராகவே பெரும்பாலான வீடுகளில் நாய்கள் மதிக்கப்படுகின்றன.
எனவே, அதனை தங்களுக்கு சாதகமாகப் பயன்படுத்திக் கொள்ளும் வியாபார நிறுவனங்கள், நாய்களுக்கென்றே பிரத்யேக உணவு, உடை உள்ளிட்டவற்றை விற்பனை செய்து வருகின்றன. தற்போது இந்த வரிசையில் நாய்களுக்கான பிரத்யேக கனவு இல்லம் உருவாக்கப்பட்டுள்ளது.
கனவு இல்லம் இது தான்...
சாம்சங் நிறுவனம் தயாரித்துள்ள இந்த கனவு இல்லத்தில், வீட்டுக்குள் பட்டனை அழுத்தினால் பாத்திரத்தில் உணவு வந்து விழுகிறது. வீட்டின் சுவரில் டிவி அமைக்கப்பட்டிருக்கிறது.
நீச்சல் குளமும் உண்டு...
வீட்டுக்கு வெளியே ட்ரெட்மில் அமைக்கப்பட்டிருக்கிறது. உடற்பயிற்சி செய்துவிட்டு, குளிப்பதற்காகச் சிறிய நீச்சல் குளமும் இருக்கிறது.
ரெஸ்ட்...
வேலைகளை முடித்துவிட்டு மென்மையான தலையணைகள் மீது படுத்து ஓய்வெடுக்கலாம். பொழுது போகவில்லை என்றால் அவை டேப் எடுத்து விளையாடலாம்.
ஜஸ்ட் ரூ. 18 லட்சம் தான்...
இவ்வாறு பல்வேறு வசதிகளுடன் தயாரிக்கப் பட்டுள்ள இந்த நாய் வீட்டின் விலை இந்திய மதிப்பில் ரூ. 18,65,263 என நிர்ணயிக்கப் பட்டுள்ளது. தற்போது இந்த வீடு இங்கிலாந்தில் காட்சிக்கு வைக்கப்பட்டுள்ளது.
நாயாப் பொறந்தாலும், இந்த மாதிரி வீட்ல வாழணும்பா....!