இளைஞரின் ஆசைக்கு இணங்குவது போல் நடித்து.. நாக்கை கடித்து துண்டாக்கிய இளம் பெண் !

By Karthikeyan

Published: Saturday, May 14, 2016, 1:52 [IST]

பாரீஸ்: பிரான்ஸ் நாட்டில் பாலியல் பலாத்காரம் செய்ய முயன்ற வாலிபரின் ஆசைக்கு இணங்குவது போல் நடித்த இளம்பெண் ஒருவர் அவரின் நாக்கை கடித்து துண்டாக்கிய சம்பவம் பரபரப்பை ஏற்படுத்தியுள்ளது.

தெற்கு பிரான்சில் உள்ள துலூஸ் நகரின் புர்பான் பகுதியைச் சேர்ந்த 19 வயது இளம் பெண். அங்குள்ள அடுக்குமாடி குடியிருப்பு ஒன்றில் வசித்து வருகிறார். இவர் புதன்கிழமை வெளியே சென்று விட்டு மாலையில் வீடு திரும்பியுள்ளார். அப்போது அவரை பின்தொடர்ந்த 24 வயது மதிக்கதக்க இளைஞர் ஒருவர் அவரை பாலியல் பலாத்காரம் செய்ய முயன்றுள்ளார். அந்த பெண் லிப்டில் செல்லும் போது அவரிடம் தகாத முறையில் நடக்க முயற்சி செய்துள்ளார்.

French woman bites off tongue of man who tried to rape her

இதையடுத்து தனது முழு பலத்தையும் காட்டி அந்த இளைஞரிடம் திருந்து தப்ப முயன்றுள்ளார் அந்த பெண். ஆனால் இளைஞரின் பிடியில் இருந்து அவரால் தப்ப முடியவில்லை. பின்னர் இனி தனது பலத்தால் அவனிடமிருந்து தப்பிக்க முடியாது என நினைத்து அவனது விருப்பத்திற்கு இணங்குவது போல் நாடகமாடியுள்ளார் அந்த பெண்.

இதனால் உற்சாகமடைந்த இளைஞர் பெண்ணிடம் தவறாக நடக்க முயன்றதுடன் முத்தம் கொடுத்துள்ளார். இது தான் தப்பிக்க சரியான தருணம் என தீர்மானித்த பெண், தனது பலம் முழுவதையும் திரட்டி இளைஞரின் நாக்கை பற்களால் பலமாக கடித்து இரண்டாக துண்டாக்கியுள்ளார். வலியால் துடித்த இளைஞர் லிப்ட் நின்றதும் ரத்தம் சொட்ட சொட்ட அங்கிருந்து தப்பி ஓடிவிட்டார்

இந்த சம்பவம் குறித்து புகார் பெற்று போலீசார் லிப்ட்டில் சோதனை செய்தபோது, அங்கு இளைஞரின் துண்டிக்கப்பட்ட பாதி நாக்கு இருந்ததை கண்டு அதனை எடுத்து மருத்துவ ஆய்வுக்கு அனுப்பி வைத்தனர்.

மேலும், பாதி நாக்குடன் தப்பிய நபரை அருகில் உள்ள மருத்துவமனையில் சிகிச்சை பெறும் போது போலீசார் கைது செய்தனர். அவர் மீது பாலியல் பலாத்காரம் செய்ய முயற்சி செய்ததாக போலீசார் வழக்கு பதிவு செய்துள்ளனர்.