‘நானும் ஹாரி திருமணத்திற்குப் போகணும்’... வைரலான 5 வயது சிறுமியின் க்யூட் அழுகை வீடியோ!

ஐந்து வயது சிறுமியின் வீடியோ ஒன்று இணையத்தில் வைரலாகியுள்ளது.

லண்டன்: இளவரசர் ஹாரியின் திருமணத்திற்கு தானும் போக வேண்டும் என ஐந்து வயது சிறுமி அழுகின்ற வீடியோ ஒன்று இணையத்தில் வைரலாகியுள்ளது.

கடந்தவாரம் இங்கிலாந்து இளவரசர் ஹாரி - மெகன் மார்க்லே திருமணம் கோலாகலமாக நடைபெற்றது. இந்த திருமணத்தை இங்கிலாந்தே திருவிழாவாகக் கொண்டாடிய போதும், அதிகாரப்பூர்வமாக திருமணத்திற்கு 600 விருந்தினர்களுக்கு மட்டுமே அழைப்புவிடப் பட்டிருந்தது.

ஆனபோதும், புதுமணத் தம்பதிகளைப் பார்ப்பதற்காகவே அவர்களது திருமண ஊர்வலம் நடைபெறும் சாலைகளில் பல்வேறு நாடுகளைச் சேர்ந்த மக்கள் குடிசைகள் அமைத்து தங்கியிருந்தனர்.

ராஜ குடும்பத்தில் நடந்த இந்தத் திருமணத்தை நேரில் பார்க்க இயலவில்லையே என்ற ஏக்கம் அந்நாட்டு மக்கள் பலருக்கும் உள்ளது. இந்நிலையில், தன்னை ஏன் இளவரசர் ஹாரி அவரது திருமணத்திற்கு அழைக்கவில்லை என லோலா என்ற ஐந்து வயது சிறுமி கதறி அழும் வீடியோ இணையத்தில் வெளியாகியுள்ளது.

அந்த வீடியோவில், சிறுமி லோலா, 'தானும் ஹாரி திருமணத்திற்கு செல்ல வேண்டும்’ எனக் கேட்கிறாள். அதற்கு அவரது தாய், 'நாமெல்லாம் அந்தத் திருமணத்திற்கு போக இயலாது. நமக்கு அழைப்பு விடுக்கப்படவில்லை’ எனப் பதிலளிக்கிறார். இதனைக் கேட்ட லோரா கதறி அழுகிறார்.

ஹாரியின் திருமணத்தையொட்டி லோராவின் பள்ளியில் தேனீர் விருந்து ஒன்றுக்கு ஏற்பாடு செய்யப்பட்டிருந்தது. அதற்கான அழைப்பிதழை தவறுதலாக ஹாரியின் திருமணத்தில் பங்கேற்பதற்கான அழைப்பிதழ் என அச்சிறுமி புரிந்து கொள்கிறாள். இதனால் ஏற்பட்ட ஏமாற்றத்தினால் அச்சிறுமி அழுகிறாள்.

தற்போது இந்த வீடியோ இணையத்தில் வைரலாகப் பரவி வருகிறது.

English summary

Five-year-old Lola burst into tears on camera when her mom explained to her that she was not going to be attending the wedding between Prince Harry and Meghan Markle.