துப்பாக்கியுடன் வந்த கொள்ளையனை அடித்து விரட்டிய சூப்பர் பெண்: சிசிடிவி வீடியோ இதோ
பாரீஸ்: பிரான்ஸில் பார் உரிமையாளரான பெண் ஒருவர் துப்பாக்கியுடன் வந்த திருடனை துணிச்சலாக அடித்து விரட்டியது சிசிடிவி கேமராவில் பதிவாகியுள்ளது.
பிரான்ஸின் நார்மன்டி பகுதியில் பார் ஒன்றை நடத்தி வருகிறார் நதாலி லெக்லெர்க். அவர் தனது பாரில் உள்ள ஒரு நாற்காலியில் கடைக்கு வந்த குழந்தையுடன் அமர்ந்திருந்தார். அப்போது முகமூடி அணிந்து துப்பாக்கி ஏந்திய திருடன் ஒருவன் பாருக்குள் நுழைந்து மிரட்டினான்.
இதை பார்த்த வாடிக்கையாளர்கள் அதிர்ச்சி அடைந்தனர். ஆனால் நதாலியோ சிறிதும் பதட்டமின்றி எழுந்து திருடனின் தனது கையில் வைத்திருந்த துப்பாக்கியை லேசாக தள்ளிவிட்டுவிட்டு சென்று குழந்தையை அதன் பெற்றோரிடம் ஒப்படைத்தார்.
அதன் பிறகு திரும்பி வந்த நதாலி துப்பாக்கியை தள்ளிவிட்டு, அவன் வைத்திருந்த பையை பறித்துக் கொண்டு, அவனை தலையில் அடித்தார். இதை பார்த்த வாடிக்கையாளர் ஒருவர் நாற்காலியை தூக்கி வந்து திருடனை தாக்கினார்.
நதாலி திருடனை அடித்து நொறுக்கி பாரை விட்டே விரட்டினார். இந்த சம்பவம் பாரில் இருந்த சிசிடிவ் கேமராவில் பதிவாகியிருந்தது.