சவுதியில் பெண்ணின் தலை துண்டிக்கப்பட்டதை வீடியோ எடுத்தவர் கைது
சவுதி: சவுதியில் பெண் ஒருவரின் தலை துண்டிக்கப்பட்டு மரண தண்டனை நிறைவேற்றப்பட்டபோது அதை வீடியோ எடுத்த நபர் கைது செய்யப்பட்டுள்ளார்.
சவுதி அரேபியாவில் உள்ள மக்கா நகரில் கடந்த 12ம் தேதி 7 வயது சிறுமியை அடித்துக் கொலை செய்த மாற்றாந்தாயின் தலை துண்டிக்கப்பட்டு மரண தண்டனை நிறைவேற்றப்பட்டது. இந்த சம்பவத்தை ஒருவர் வீடியோ எடுத்துள்ளார். அந்த வீடியோ ஆன்லைனில் வெளியிடப்பட்டது.
இந்நிலையில் மரண தண்டனை நிறைவேற்றப்பட்டதை வீடியோ எடுத்த நபர் கைது செய்யப்பட்டுள்ளதாக உள்ளூர் ஊடகங்கள் ஞாயிற்றுக்கிழமை செய்தி வெளியிட்டுள்ளன. மேலும் அந்த நபர் வழக்கு விசாரணைக்கு உட்படுத்தப்பட உள்ளதாகவும் தெரிவிக்கப்பட்டுள்ளது. ஆனால் அவர் மீது என்ன குற்றம் சுமத்தப்பட்டுள்ளது என்று தெரியவில்லை.
சவுதியில் தலை துண்டிக்கப்பட்டு மரண தண்டனை நிறைவேற்றப்படுவதற்கு பல நாடுகள் தொடர்ந்து எதிர்ப்பு தெரிவித்து வருகின்றன. இருப்பினும் தண்டனை நிறைவேற்றப்பட்டு வருகிறது.
பிளாக்கர் ஒருவருக்கு சவுதியில் அண்மையில் பொது இடத்தில் வைத்து கசையடி கொடுக்கப்பட்டது. இதற்கு ஐ.நா. கடும் எதிர்ப்பு தெரிவித்தது என்பது குறிப்பிடத்தக்கது.