கோமாவில் இருக்கும் ஷூமாக்கரின் உடலில் அசைவுகள்: பிரான்ஸ் ஊடகங்கள்
பாரிஸ்: பனிச்சறுக்கு விளையாட்டின்போது அடிபட்டு கோமாவில் இருக்கும் பார்முலா ஒன் கார்பந்தய வீரரான மைக்கேல் ஷூமாக்கரின் உடலில் அசைவுகள் ஏற்பட்டதாக பிரான்ஸ் நாட்டு ஊடகங்கள் தெரிவித்துள்ளன.
கடந்த டிசம்பர் மாதம் 29ம் தேதி பார்முலா ஒன் கார்பந்தய வீரர் ஷூமாக்கர் பிரான்ஸில் பனிச்சறுக்கு விளையாட்டில் ஈடுபட்டபோது விபத்து ஏற்பட்டு தலையில் பலத்த அடிபட்டது. இதையடுத்து அருகில் உள்ள மருத்துவமனையில் அனுமதிக்கப்பட்ட அவருக்கு மூளையில் அறுவை சிகிச்சை செய்யப்பட்டது.
அவர் கடந்த 29ம் தேதியில் இருந்து கோமாவில் உள்ளார். அவர் தனது வாழ்நாள் முழுவதும் கோமாவில் இருக்கக்கூடும் என்று கூறப்பட்டது. இந்நிலையில் அவரது உடலில் அசைவுகள் ஏற்பட்டுள்ளதாக பிரான்ஸ் ஊடகங்கள் செய்தி வெளியிட்டுள்ளன.
இந்த செய்தியை ஷூமாக்கரின் உதவியாளர் உறுதி செய்யவும் இல்லை அதே நேரம் மறுக்கவும் இல்லை.
இது குறித்து அவர் மேலும் கூறுகையில்
ஷூமாக்கரின் உடல் நிலை பற்றி அவருக்கு சிகிச்சை அளிக்கும் மருத்துவர்கள் அல்லது அவரது நிர்வாக குழு தெரிவிப்பதை மட்டுமே நம்புங்கள். மேலும் அவரின் உடல் நிலை குறித்து வரும் கணிப்புகளை எல்லாம் நம்ப வேண்டாம் என்றார்.