நோபல் பரிசு பெற்ற 'மலேரியா'வுக்கு வாழ்த்துக்கள்: பிரபல மாடல் நவோமி சொதப்பல்
லண்டன்: பிரபல மாடல் அழகி நவோமி காம்பெல் அமைதிக்கான நோபல் பரிசுக்கு தேர்வாகியுள்ள பாகிஸ்தானி சிறுமி மலாலாவுக்கு வாழ்த்து தெரிவித்துள்ளார். தனது வாழ்த்து செய்தியில் அவர் மலாலாவின் பெயரை மலேரியா என்று எழுதியுள்ளார்.
இங்கிலாந்தைச் சேர்ந்தவர் பிரபல மாடலான நவோமி காம்பெல்(44). அவர் அமைதிக்கான நோபல் பரிசுக்கு தேர்வாகியுள்ள பாகிஸ்தான் சிறுமி மலாலா யூசப்சாய்க்கு இன்ஸ்டாகிராமில் வாழ்த்து தெரிவித்துள்ளார்.
அவர் தனது வாழ்த்துச் செய்தியில் நோபல் என்ற வார்த்தையை தவறாக எழுதியதோடு, மலாலா என்பதற்கு மலேரியா என்றும் எழுதியுள்ளார்.
இதை பார்த்த மக்கள் நவோமி காம்பெலை கிண்டலடிக்க ஆரம்பித்தனர். அதன் பிறகு அவர் ட்விட்டரில் தனது தவறுக்காக மன்னிப்பு கேட்டுள்ளார்.
இது குறித்து அவர் ட்விட்டரில் கூறியிருப்பதாவது, நானும், எனது ஐபோனும் சரியில்லை. நான் ஒன்று டைப் செய்தால் அது ஒன்று வருகிறது. மன்னித்து விடுங்கள் என்று தெரிவித்துள்ளார்.