யு.எஸ்.: நெடுஞ்சாலையில் அவசரமாக தரையிறங்கி பீதியை கிளப்பிய குட்டி விமானம்
டிரென்டன்: அமெரிக்காவின் நியூஜெர்சி மாநிலத்தில் சிறிய ரக விமானம் ஒன்று நெடுஞ்சாலையில் அவசரமாக தரையிறங்கியதால் பரபரப்பு ஏற்பட்டது.
அமெரிக்காவின் நியூஜெர்சி மாநிலத்தில் உள்ள ஸ்டாட்போர்டில் சிறிய ரக விமானம் ஒன்று ஸ்கைடைவிங் மாணவர்களுடன் கிளம்பியது. விமானத்தில் பயிற்சியாளர், மாணவர்கள் என 5 பேர் இருந்தனர். விமானம் நடுவானில் பறக்கையில் திடீர் என்று அதில் கோளாறு ஏற்பட்டது.
இதையடுத்து விமானி விமானத்தை நெடுஞ்சாலையில் அவசரமாக தரையிறக்கினார். நல்ல வேளையாக விமானம் சாலையில் சென்ற வாகனங்கள் மீது மோதவில்லை. பின்னர் விமானம் ஒருவகையாக மீடியானில் நின்றது.
இந்த சம்பவத்தில் விமானத்தில் இருந்த பயிற்சியாளரின் கையில் காயம் ஏற்பட்டது. மற்ற யாரும் காயம் அடையவில்லை. பயிற்சியாளர் அருகில் உள்ள மருத்துவமனைக்கு அழைத்துச் செல்லப்பட்டார்.
இந்த சம்பவம் குறித்த வீடியோவை ஸ்டாட்போர்ட் போலீசார் வெளியிட்டுள்ளனர். கடந்த ஞாயிற்றுக்கிழமை காலை 10.15 மணிக்கு நடந்த இந்த சம்பவம் பற்றி போலீசார் விசாரணை நடத்தி வருகின்றனர்.