அட பக்கி.... பலூனுக்குள் நுழைந்து சாகசம் செய்யப் போய் மாட்டிக் கொண்ட நபர்!
நியூயார்க்: நியூயார்க்கில் ஆளுயர தண்ணீர் பலூனில் நுழைந்த நபர் அதில் மாட்டிக்கொண்டு உயிருக்கு போராடிய அதிர்ச்சியளிக்கும் வீடியோ யூடியூபில் சமீபத்தில் வெளியிடப்பட்டது.
யூடியூபில் கேலி, கிண்டல் செய்யும் வீடியோக்களை வெளியிடும் ஜாக் டென்னி என்பவர் பலூனுக்குள் இறங்கி ஒரு ரிஸ்க்கான சாகசம் செய்ய முற்பட்டபோது, துரதிர்ஷ்டவசமாக அதில் சிக்கிக்கொண்டார். புத்திசாலித்தனமாக செயல்பட்ட நண்பர்களால் மயிரிழையில் அவர் உயிர் தப்பினார்.
ஜாக் டென்னி சர்பிங் செய்யும் வீடியோக்களை வெளியிடும் ஒரு குறும்புக்கார நெட்டிசன். அவர் சமீபத்தில் நீச்சல் குளத்தில் படகு ஒன்றை வைத்து, அதற்குள் பெரிய பலூன் ஒன்றில் தண்ணீர் நிரப்பிக்கொண்டே அதன் உள்ளே நுழைந்தார். படகின் ஒரு மூலையில் அமர்ந்திருந்தவர் முழுமையாக பலூனுக்குள் நுழைந்த வேளையில் படகு திடீரென மூழ்க ஆரம்பித்ததும் அதிர்ச்சியடைந்தார்.
இச்சம்பவத்தை வீடியோ பதிவு செய்துகொண்டிருந்த நண்பர்களில் சிலர் சூழ்நிலை புரிந்தவுடன் உடனடியாக ஸ்க்ரூ டிரைவருடன் தண்ணீரில் குதித்து பலூனை உடைத்து ஜாக்கை காப்பாற்றினர். அதிர்ச்சி தரும் இந்த வீடியோ தற்போது யூடியூபின் வைரலாக பரவி வருகிறது.