ரஷ்ய விமானத்திற்குள் குண்டு அல்லது எரிபொருள் டேங்க் வெடித்திருக்கக்கூடும்: அமெரிக்கா
கெய்ரோ: எகிப்தில் விபத்துக்குள்ளான ரஷ்ய விமானத்திற்குள் குண்டு அல்லது எரிபொருள் டேங்க் வெடித்துச் சிதறியிருக்கும் என்று அமெரிக்க செயற்கைக்கோள் புகைப்படங்கள் தெரிவிக்கின்றன.
எகிப்தில் இருந்து ரஷ்யாவில் உள்ள செயின்ட் பீட்டர்ஸ்பெர்க் நகருக்கு 224 பேருடன் கடந்த சனிக்கிழமை கிளம்பிய ரஷ்ய விமானம் சினாய் மாகாணத்தில் விபத்துக்குள்ளானது. இதில் விமானத்தில் இருந்த அனைவரும் பலியாகினர்.
விமானத்தை தாங்கள் தான் சுட்டு வீழ்த்தியதாக ஐஎஸ்ஐஎஸ் தீவிரவாதிகள் தெரிவித்துள்ளனர். இந்நிலையில் விமானத்தினுள் ஏதோ வெடித்து தான் விபத்து ஏற்பட்டுள்ளது என்பது அமெரிக்க செயற்கைக்கோள் புகைப்படங்கள் மூலம் தெரிய வந்துள்ளது.
இது குறித்து அமெரிக்க பாதுகாப்புத் துறை மூத்த அதிகாரி ஒருவர் கூறுகையில்,
விமானத்திற்குள் ஏதோ வெடித்துள்ளது. இதையடுத்து விமானம் நடுவானில் வெடித்துச் சிதறியுள்ளது. ஏவுகணை எதுவும் விமானத்தை தாக்கியதாக ஆதாரங்கள் இல்லை. விமானத்திற்குள் வெடிகுண்டு அல்லது எரிபொருள் டேங்க் வெடித்திருக்க வேண்டும் என்றார்.
சம்பவ இடத்தில் எடுக்கப்பட்ட இன்ப்ரா ரெட் புகைப்படங்களில் விமானம் வெடித்துச் சிதறியது தெரிய வந்துள்ளது.