பெண்களின் நீச்சல் உடையில் விநாயகர் படம்... கொந்தளிக்கும் இந்து அமைப்புகள்
கலிபோர்னியா: அமெரிக்காவைச் சேர்ந்த ஒரு நிறுவம், பெண்கள் அணியும் நீச்சல் உடை மற்றும் வாட்டர் போலோ உடைகளில் விநாயகர் படத்தை பொறித்து விற்பனைக்கு அனுப்பியுள்ளது. இது குறித்து உலகம் முழுவதும் உள்ள இந்துக்கள் அதிர்ச்சியும், கண்டனமும் தெரிவித்துள்ளனர்.
விநாயகர் சதுர்த்திக்கு இன்னும் 20 நாட்களே உள்ளன. விநாயகர் சதுர்த்திக்காகப் பலரும் பல விதமான விநாயகர் உருவச் சிலைகளை வடிவமைத்து வணங்கத் தயாராகி வரும் நிலையில், பெண்களின் நீச்சல் உடையில் விநாயகர் உருவம் பொறித்து விற்பனைக்கு விட்டுள்ளது அந்த அமெரிக்க நிறுவனம்.
இந்த நீச்சல் உடை விற்பனையை அந்த நிறுவனம் உடனே நிறுத்த வேண்டும் என்று வலியுறுத்தியுள்ள, இந்து அமைப்பினர் இந்த செயலுக்கு கடும் கண்டனம் தெரிவித்துள்ளனர்.
இது குறித்து பிரபஞ்ச இந்து சமுதாய அமைப்பின தலைவர் ராஜன் ஜெட் கண்டனம் தெரிவித்து வெளியிட்டுள்ள அறிக்கையில் கூறியுள்ளதாவது...
வாட்டர் போலோ மற்றும் நீச்சல் உடைகளில் கணேச பெருமானின் உருவம் பொறித்திருப்பது வேதனைக்குரியது. வணக்கத்திற்குரிய இந்து கடவுளின் உருவத்தை பெண்களின் உடைகளில் பொறித்து விற்பது மிகவும் தவறு.
இந்த நிறுவனம் உடனடியாக இத்தகைய உடைகளை தயாரிப்பதை நிறுத்துவதோடு, விற்பனைக்காக கடைகளுக்கு அனுப்பப்பட்டுள்ள ஆடைகளையும் திரும்ப பெற வேண்டாம். இந்து மக்களிடம் அந்த நிறுவனம் பகிரங்க வருத்தம் தெரிவிக்க வேண்டும் என்று கூறியுள்ளார்.