பதினைந்து நாளாக தொடரும் தாமஸ் காட்டுத் தீ.. பற்றி எரியும் கலிபோர்னியா நகரம்
அமெரிக்காவின் கலிபோர்னியா மாகாணத்தில் இருக்கும் பல்வேறு பகுதிகள் தாமஸ் காட்டுத் தீயால் பாதிக்கப்பட்டு இருக்கிறது.
கலிபோர்னியா: அமெரிக்காவின் கலிபோர்னியா மாகாணத்தில் இருக்கும் பல்வேறு பகுதிகள் தாமஸ் காட்டுத் தீயால் பாதிக்கப்பட்டு இருக்கிறது. இதுமட்டும் இல்லாமல் நகரம் மொத்தத்தையும் 6 க்கும் மேற்பட்ட காட்டுத் தீ சூழந்து இருக்கிறது.
இந்த காட்டுத் தீ உருவாகி இரண்டு வாரத்திற்கும் அதிகமாகிவிட்டது. இதன் காரணமாக மொத்த கலிபோர்னியா நகரமே நாசமாகி இருக்கிறது.
இது லாஸ் ஏஞ்சலஸ் நகரத்தை தாக்குவதற்கு முன்பே நிறுத்தப்படும் என்று கூறப்பட்டது. ஆனால் தற்போது லாஸ் ஏஞ்சல்ஸ் பகுதியிலும் பல்வேறு இடங்களை இந்த தீ நாசம் செய்து இருக்கிறது. இன்னும் இந்த தீ கட்டுப்படுத்த முடியாமல் பரவிக் கொண்டு இருக்கிறது.
தீ எப்படி தொடங்கியது
அமெரிக்காவில் காட்டுத் தீ அதிகம் ஏற்படும் பகுதிகளில் கலிபோர்னியா முக்கிய இடத்தில் இருக்கிறது. இந்த ஒருமாதம் மட்டுமே ஒரே நேரத்தில் கலிபோர்னியாவில் மொத்தம் தற்போது 6 காட்டுத் தீக்கள் உருவாகி உள்ளது. ஒரே மாதத்தில் கலிபோர்னியாவில் 6 தீ ஏற்படுவது இதுவே முதல் முறை. இந்த காட்டுத் தீ முதலில் வென்சுரா என்ற பகுதியில் உருவானது. பின் சாண்டா பார்ப்பாரா பகுதியில் உக்கிரமானது.
இப்போது எப்படி இருக்கிறது
இந்த காட்டுத் தீயில் தாமஸ் என்ற காட்டுத் தீயை அணைப்பது மட்டும் மிகவும் சிரமமான காரியமாக இருக்கிறது. இது லாஸ் ஏஞ்சல்ஸ் பகுதியை அடைவதற்குள் எப்படியாவது அணைக்கப்பட்டு விடும் என்று கூறப்பட்டது. ஆனால் தற்போது லாஸ் ஏஞ்சல்ஸ் பகுதியையும் இந்த தீ கைப்பற்றிவிட்டது. 2,65,000 ஏக்கர் நிலப்பரப்பை லாஸ் ஏஞ்சல்ஸ் பகுதியில் மட்டும் ஆக்கிரமித்து இருக்கிறது. இந்த தீ மொத்தமாக ஆக்கிரமித்த பகுதிகள் லண்டனின் அளவை விட அதிகமாகி விட்டது.
திணறல்
இதனால் ஏற்பட்ட புகை நியூயார்க் நகரத்தில் கூட பரவி இருக்கிறது. 1000 தீ அணைப்பு வாகனங்களும், 32 ஹெலிகாப்டர்களும், 8,500 தீயணைப்பு வீரர்களும் இந்த பணியில் ஈடுபடுத்தப்பட்டு இருக்கிறார்கள். இதுவரை 750 கோடிக்கும் அதிகமாக இதனால் செலவு ஆகி இருக்கிறது. எவ்வளவு இழப்பு என்று தீ அணைந்த பின்பே கண்டுபிடிக்க முடியும். 3000 கோடிக்கும் அதிகமாக கண்டிப்பாக இழப்பு ஏற்பட்டு இருக்க வாய்ப்பு உள்ளதாக கூறப்படுகிறது.
மரணம்
இதுவரை கணக்குப்படி 100க்கும் அதிகமானோர் மரணம் அடைந்து உள்ளனர். ஆனால் தீ காரணமாக மரணம் குறித்த கணக்குகள் சரியாக தெரிவிக்கப்படவில்லை. 3,00,000 பேர் கலிபோர்னியா விட்டு வெளியேறிவிட்டனர். 10,000க்கும் அதிகமான வீடுகள் அப்படியே தீக்கு இரையாகி இருக்கிறது. அமெரிக்க வரலாற்றில் ஏற்பட்ட 7 பெரிய காட்டுத் தீயில் இதுவும் ஒன்று. இதனால் அங்கு கிறிஸ்மஸ் கொண்டாட்டங்கள் நிறுத்தி வைக்கப்பட்டு இருக்கிறது .