‘ஆப்பிள்’ ஆசை... தனது பெயரை ‘ஐ போன் 7’ என மாற்றிக் கொண்ட இளைஞர்..!
உக்ரைன் நாட்டில் எலக்ட்ரானிக் விற்பனையகம் ஒன்று நடத்திய போட்டியில் வெல்வதற்காக தனது பெயரை, ‘ஐ போன் 7’ என அதிகாரப்பூர்வமாக மாற்றி இருக்கிறார் இளைஞர் ஒருவர்.
கீவ்: போட்டி ஒன்றில் வெல்வதற்காக தனது சொந்தப் பெயரையே 'ஐ போன் 7' என மாற்றி இருக்கிறார் உக்ரைன் இளைஞர் ஒருவர்.
ஆப்பிள் நிறுவனம் சமீபத்தில் ஐ போன் 7-ஐ சந்தையில் விற்பனைக்கு அறிமுகப்படுத்தியது. இந்தப் போனை விளம்பரப் படுத்துவதற்காக அந்த நிறுவனம் பல்வேறு யுக்திகளைக் கையாண்டு வருகிறது.
அதன் ஒரு பகுதியாக எலக்ட்ரானிக் விற்பனையகம் ஒன்று, தனது பெயரை 'ஐ போன் 7' என அதிகாரப்பூர்வமாக மாற்றிக் கொள்ளும் முதல் ஐந்து பேருக்கு, ஐ போன் 7 போனை பரிசாக அளிப்பதாக அறிவித்தது.
இந்த சவாலை ஏற்றுக் கொண்ட 20 வயதான உக்ரைன் நாட்டைச் சேர்ந்த இளைஞர் ஒருவர், தனது பெயரை அதிகாரப்பூர்வமாக 'ஐ போன் செவன்' என மாற்றிக் கொண்டுள்ளார்.
அதனைத் தொடர்ந்து அந்த விற்பனையகம் புது ஐ போன் 7 ஒன்றை அந்த இளைஞருக்கு பரிசாக அளித்துள்ளது.
ஐ போன் 7 -ன் விற்பனை விலை 850 அமெரிக்க டாலர்கள் ஆகும். ஆனால், அந்த இளைஞருக்கு தனது பெயரை அதிகாரப்பூர்வமாக மாற்ற வெறும் 2 அமெரிக்க டாலர்கள் மட்டுமே செலவானதாம்.
அதோடு, தனது பெயரை தற்காலிகமாக மட்டுமே மாற்றியுள்ளதாக கூறியுள்ள அந்த இளைஞர், தனக்கு திருமணமாகி குழந்தைகள் பிறந்தவுடன், மீண்டும் பழைய பேருக்கு மாறி விடுவேன் என கூறியுள்ளது குறிப்பிடத்தக்கது.