அமெரிக்க பிணை கைதியை தலையை வெட்டி கொலை செய்து வீடியோ வெளியிட்ட ஐஎஸ்ஐஎஸ்
பெய்ரூட்: சிரியா நாட்டில் ஐஎஸ்ஐஎஸ் தீவிரவாதிகளால் சிறை பிடிக்கப்பட்ட அமெரிக்காவை சேர்ந்த பணியாளர் தலையை வெட்டி கொலை செய்துள்ளதாக தீவிரவாதிகள் அறிவித்துள்ளனர். மேலும் பல சிரியா ராணுவ வீரர்களையும் தலையை துண்டித்துக் கொலை செய்து அந்த வீடியோவை இணையத்தில் வெளியிட்டுள்ளனர் தீவிரவாதிகள்.
அமெரிக்கரான அப்துல் ரகுமான் கஸ்சிக், சிரியா நாட்டில் பணியாளராக வேலை பார்த்து வந்தார். கடந்த ஆண்டு அக்டோபர் மாதத்தில் தீவிரவாதிகளால் இவர் கடத்தப்பட்டிருந்தார். இந்நிலையில் தற்போது ஒரு வீடியோ இணையத்தில் உலா வருகிறது. அந்த வீடியோவில் முகமூடி அணிந்திருக்கும் நபர் ஒருவர் கையில் வெட்டப்பட்ட தலையுடன் நின்றபடி கஸ்சிக்கை கொலை செய்துள்ளதாக கூறுகிறார்.
கடந்த மாதம்தான் கஸ்சிக் அமெரிக்காவின் இந்தியானா மாகாணத்திலுள்ள தனது பெற்றோருக்கு ஒரு கடிதம் எழுதியிருந்தார். அந்த கடிதத்தில், எந்த மனிதனும் அனுபவிக்க கூடாதாத அவஸ்தை, பயத்துடன் தான் வாழ்ந்து வருவதாக கூறியிருந்தார். இந்நிலையில் அவரை கழுத்தை அறுத்து தீவிரவாதிகள் படுகொலை செய்துள்ளதாக கூறப்படுகிறது. இந்த வீடியோவின் உண்மை தன்மை ஆராயப்பட்டு வந்தபோதிலும், இதற்கு முன்பு இதேபோல வெளியான வீடியோக்கள் உண்மையானவை என்பது உறுதி செய்யப்பட்டுள்ளதால் அமெரிக்காவில் பரபரப்பு தொற்றிக்கொண்டுள்ளது.
மேலும் அந்த வீடியோவில் சிரியா நாட்டு ராணுவ வீரர்கள் பலரின் தலைகளும் வெட்டப்பட்ட காட்சி உள்ளது.