"தில்"லுன்னா அது இதுதான்... "திருடர் குல திலகம்"னா அது இவர் மட்டும்தான்!
இர்வின், அமெரிக்கா: திருடர் குல திலகம் திகில் பாண்டியெல்லாம் இவரிடம் பிச்சை எடுக்க வேண்டும்... அப்படி ஒரு செயலைச் செய்துள்ளார் இந்த அமெரிக்கத் திருடன்.
தன்னிடம் விசாரணை நடத்திய போலீஸ் அதிகாரியின் பேட்ஜையே திருடியிருக்கிறார் என்றால் பாருங்களேன். அதுவும் விசாரணை நடந்து கொண்டிருந்த சமயத்திலேயே இப்படி ஆட்டையைப் போட்டு போலீஸாரை அதிர வைத்துள்ளார் இந்த திரு"டர்".
அந்த நபரின் பெயர் ராபர்ட் டிங்கிள்ஸ்டீன். 26 வயதுதான் ஆகிறது புள்ளையாண்டானுக்கு. இவரை கடந்த ஆண்டு அக்டோபர் 30ம் தேதி இர்வின் நகர போஸீஸார் கைது செய்து ஒரு வழக்குத் தொடர்பாக விசாரித்துக் கொண்டிருந்தனர். அந்த சமயத்தில் அந்த இடத்தில் இருந்த பல போலீஸ் பேட்ஜுகளை இவர் திருடியுள்ளார். நைசாக தனது பாக்கெட்டில் ஒளித்துக் கொண்டார்.
அதே பகுதியில் இன்னொரு இடத்தில் பெண் ஒருவரையம் போலீஸார் விசாரித்துக் கொண்டிருந்தனர். இதற்காக அங்குமிங்குமாக அவர்கள் போய் வந்ததைப் பயன்படுத்தி பேட்ஜுகளை ஆட்டையைப் போட்டுள்ளார் ராபர்ட்.
விசாரணை முடிவில் அவரை விட்டு விட்டனர். இந்த நிலையில் கடந்த மாதம்தான் பேட்ஜ் திருட்டுப் போனது தெரிய வந்தது போலீஸாருக்கு. இதற்கிடையே, தான் திருடிய பேட்ஜுகளை மீண்டும் கொண்டு வந்து கொடுத்து மன்னிப்பும் கேட்டுள்ளார் ராபர்ட். இதையடுத்து அவர் மீது புதிய வழக்கைப் போலீஸார் போட்டுள்ளனர். அவர் மீது விரைவில் விசாரணை நடைபெறவுள்ளதாம்.