கணவருக்கு ஆபரேஷன்... மருத்துவச் செலவிற்காக ஒரு வயது மகளை விற்க முயன்ற பெண்
பீஜிங்: சீனாவில் கணவனின் உயிரை காப்பாற்றுவதற்காக, பெற்ற மகளை விற்க தாய் முயற்சித்த சம்பவம் பரபரப்பை ஏற்படுத்தியுள்ளது.
சீனாவின் பஸ்ஹூ நகரைச் சேர்ந்த கட்டிடத் தொழிலாளி ஜூவோ குய்சிங்கின் மனைவி நீ குவாங் (25). கடந்த வியாழக்கிழமை 3 மாடிக் கட்டிடத்தில் பணி புரிந்து கொண்டிருந்த ஜூவோ எதிர்பாரா விதமாக கால் தவறி கீழே விழுந்தார். இதில் அவரது முதுகு தண்டுவடத்தில் பலத்த காயம் ஏற்பட்டது.
உடனடியாக சிகிச்சைக்காக மருத்துவமனையில் சேர்க்கப் பட்டார் ஜூவோ. அங்கு அவருக்கு முதுகில் ஆபரேஷன் செய்ய வேண்டும் என மருத்துவர்கள் தெரிவித்துள்ளனர். ஆபரேஷனுக்கு தேவையான பணம் நீகுவாங்கிடம் இல்லை.
கணவரின் மருத்துவச் செலவிற்காக தனது ஒரு வயது மகளை விற்க முடிவு செய்தார் நீகுவாங். அதன்படி, பஸ்ஹு நகர சாலையில் மண்டியிட்டபடி, ‘எனது கணவரின் ஆபரேஷனுக்கு பணம் தேவைப்படுகிறது. யாராவது என் ஒரு வயது மகளை எடுத்துக் கொண்டு பணம் தாருங்களேன்' எனக் கெஞ்சியுள்ளார்.
அந்த சாலை வழியே சென்ற பொதுமக்கள் இது தொடர்பாக ஊடகங்களுக்கு தகவல் அளித்தனர். ஊடகங்களில் வெளியான இச்செய்தியைப் பார்த்த பொதுமக்களில் சிலர், தற்போது ஜூவோங்கின் சிகிச்சைக்காக நிதி அனுப்பி வருகின்றனர்