மதுரையில் பாஜகவினரை ஓட ஓட விரட்டியடித்த விசிக நிர்வாகிகள்- வைரல் வீடியோ
மதுரை: மனுதர்மம் விவகாரத்தில் மதுரையில் விடுதலை சிறுத்தைகள் நடத்திய போராட்ட இடத்துக்கு வந்த பாஜகவினரை அந்த கட்சி நிர்வாகிகள் ஓட ஓட விரட்டியடித்த வீடியோ சமூக வலைதளங்களில் வைரலாக ஷேர் செய்யப்பட்டு வருகிறது.
மனுதர்மம் பெண்களை இழிவுபடுத்துகிறது என விடுதலை சிறுத்தைகள் கட்சித் தலைவர் திருமாவளவன் பேசியிருந்தார். ஆனால் இந்து பெண்கள் அத்தனை பேரையுமே திருமாவளவன் இழிவாக விபச்சாரிகள் என பேசிவிட்டார் என பாஜக கூறுகிறது.
தேர்தல் நேரத்தில் மட்டும் சிலருக்கு கடவுள் தேவைப்படுகிறாரோ... யாரை கேட்கிறார் குஷ்பு
சென்னை போராட்டம்
திருமாவளவனை கைது செய்யக் கோரி பல இடங்களில் பாஜகவினர் போராட்டம் நடத்தினர். சென்னையில் நடிகை கவுதமி, காயத்ரி ரகுராம் உள்ளிட்டோர் இன்றைய போராட்டத்தில் பங்கேற்றனர்.
குஷ்பு கைதாகி விடுதலை
சிதம்பரத்தில் போராட்டம் நடத்த சென்ற பாஜக நடிகை குஷ்பு முட்டுக்காடு அருகே கைது செய்யப்பட்டு சொகுசு விடுதியில் தங்க வைக்கப்பட்டார். அப்போது குஷ்பு தங்கவைக்கப்பட்ட விடுதியை விடுதலை சிறுத்தைகள் முற்றுகையிட்டு முழக்கம் எழுப்பினர். அவர்களை போலீசார் தடியடி நடத்தி கலைத்தனர்.
மதுரை விசிக போராட்டம்
மதுரையில் பாஜகவுக்கு எதிராக இன்று விடுதலை சிறுத்தைகள் போராட்டம் நடத்தினர். அப்போது அங்கு பாஜகவினர் வந்து முழக்கங்களை எழுப்பினர். இதனையடுத்து அந்த பாஜகவினரை சூழ்ந்து விடுதலை சிறுத்தைகள் கட்சியினர் முழக்கமிட்டனர்.
பாஜகவினர் விரட்டியடிப்பு
ஒருகட்டத்தில் பாஜகவை சேர்ந்தவர்கள் அந்த இடத்தில் இருந்து தப்பி ஓட விடுதலை சிறுத்தைகளும் துரத்தினர். இரு கட்சியினர் பின்னால் போலீசாரும் ஓட நேர்ந்தது. இந்த வீடியோ காட்சிகள் சமூக வலைதளங்களில் வைரலாக பரவி வருகின்றன.