மும்பை பாஜக தலைவர் மங்கல் பிரபாத் சொத்து மதிப்பு தெரியுமா.. பிரமாண பத்திரத்தை பார்த்தால் தலைசுற்றும்
மும்பை: மகாராஷ்டிரா மாநிலம் மும்பை மாநகர பாஜக தலைவராக பதவி வகிப்பவர் மங்கல் பிரபாத் லோதா. இவரது சொத்து மதிப்பை கேட்டால் மயக்கம் வந்தாலும் ஆச்சரியப்பட தேவையில்லை.
பாஜக தலைவர் பதவியோடு, மும்பை மலபார் ஹில் தொகுதியிலிருந்து எம்எல்ஏ பதவியையும் வகித்து வருகிறார். தெற்கு மும்பையின் செல்வந்தர்கள் ஏரியாக்களில் மலபார் ஹில் தொகுதியும் ஒன்றாகும்.
கடந்த 1995ம் ஆண்டு முதல் தொடர்ச்சியாக 5 முறை இதே தொகுதியிலிருந்து எம்எல்ஏவாக உள்ள இவர், இப்போது 6வது முறையாக போட்டியிடுகிறார். இவர் நேற்று தனது வேட்புமனுவை தாாக்கல் செய்தார். தனது பிரமாணப் பத்திரத்தில் 441 கோடி ரூபாய் மதிப்புக்கு சொத்துக்கள் இருப்பதாக குறிப்பிட்டுள்ளார்.
63 வயதாகும் மங்கல் பிரபாத் லோதா, நாட்டின் பணக்கார அரசியல்வாதிகளில் ஒருவர். மங்கல் பிரபாத் அளித்த, பிரமாணப் பத்திரத்தின்படி, அவருக்கும் அவரது மனைவிக்கும் ரூ. 252 கோடி மதிப்புக்கு அசையும் சொத்துக்கள் உள்ளன.
அசையா சொத்துக்கள் மதிப்பு சுமார் ரூ. 189 கோடி. ரூ.14 லட்சம் மதிப்புள்ள ஜாகுவார் கார் ஒன்று இவருக்கு உள்ளது. அவரது பிற முதலீடுகள் பத்திரங்கள் மற்றும் பங்குகளில் செய்யப்பட்டுள்ளன. லோதாவின் கடன் மதிப்பு ரூ. 283 கோடி.
இவரது குடும்பம் ரியல் எஸ்டேட் தொழிலில் ஈடுபட்டுள்ளது. தெற்கு மும்பையில் ஐந்து குடியிருப்புகள் மற்றும் ராஜஸ்தானில் ஒரு பிளாட் உள்ளது.
லோதா மற்றும் அவரது மனைவி இருவரும் மலபார் ஹில் பகுதியில் ஒரு வீடு வைத்திருக்கிறார்கள். தவிர, அவரது மனைவி தெற்கு மும்பையில் மற்றொரு பிளாட் மற்றும் வணிகச் சொத்தையும் வைத்திருக்கிறார். லோதா மீது ஐந்து கிரிமினல் வழக்குகள் நிலுவையில் உள்ளன.
மகாராஷ்டிரா சட்டசபைக்கு, அக்டோபர் 21 ம் தேதி வாக்குப்பதிவும், அக்டோபர் 24ம் தேதி வாக்கு எண்ணிக்கை நடைபெறும்.