சொந்தக் கொடியை எரித்து... சேம் சைட் கோல் போட்டுட்டீங்களே.. புதுவையில் பாஜக காமெடி!
புதுச்சேரி : புதுச்சேரி மாநிலத்தில் காங்கிரஸ் தேர்தல் அறிக்கையை பாஜகவினர் தீயிட்டு கொளுத்தும் போது தங்களது கட்சி கொடியையும் தீயில் போட்டதால் பரபரப்பு ஏற்பட்டது.
Recommended Video
புதுச்சேரி மாநிலத்தில் கடந்த சட்டமன்ற தேர்தலில் அறிவித்த வாக்குறுதிகளை எதையும் நிறைவேற்றாத ஆளும் காங்கிரஸ் அரசை கண்டித்து புதுச்சேரி மாநில பாஜகவினர் போராட்டம் நடத்தினர். 500-க்கும் மேற்பட்டோர் புதுச்சேரி- கடலூர்- விழுப்புரம்- சென்னை சந்திப்பு சாலையான இந்திரா காந்தி சிலை அருகே கண்டன ஆர்ப்பாட்டத்தில் ஈடுபட்டனர்.
அப்போது காங்கிரஸ் தேர்தல் அறிக்கையை தீயிட்டுக் கொளுத்தி தங்கள் எதிர்ப்பை தெரிவித்தனர். அந்த நேரத்தில் வாக்குறுதி தாள்களுடன், பாஜக கட்சி கொடியையும் அவர்கள் நெருப்பில் போட்டனர். சுதாரித்துக் கொண்ட அருகில் இருந்த பாஜக நிர்வாகிகள் அந்த கொடியை உடனடியாக நெருப்பிலிருந்து எடுத்தனர். இது பரபரப்பை ஏற்படுத்தி உள்ளது.
மேலும் முக்கிய சாலை சந்திப்பான இந்திராகாந்தி சிலையில் 500க்கும் மேற்பட்டோர் ஒன்றாக கூடியதால் சுமார் ஒரு மணி நேரத்துக்கு மேலாக கடுமையான போக்குவரத்து நெரிசல் ஏற்பட்டது. இதனால் மருத்துவமனைக்கு ஆம்புலன்ஸ் செல்ல முடியாமல் சிக்கித் தவித்தது. இது பொதுமக்களிடம் வெறுப்பை ஏற்படுத்தியது.