நடிகர் கவுண்டமணிக்கு இன்று பிறந்தநாள்... அவரது முதல் படம் 16 வயதினிலே அல்ல...

இன்று தனது பிறந்தநாளை கொண்டாடிய நடிகர் கவுண்டமணியை பற்றிய ஒரு நல்ல தகவல் குறித்து சமூக வலைதளங்களில் வெளியாகி வருகின்றன.

சென்னை: இன்று தனது பிறந்தநாளை கொண்டாடிய சுப்பிரமணி கருப்பையா என்கிற கவுண்டமணியின் முதல் படம் 16 வயதினிலே அல்ல என்ற ஒரு தகவல் சமூக வலைதளங்களில் வேகமாக பரவி வருகிறது.

நடிகர் கவுண்டமணி என்றாலே அவரது பாடி லாங்க்வேஜை பார்த்தாலே போதும் சிரிப்பு வந்துவிடும். அந்த காலங்களில் படத்தின் கதை நன்றாக வில்லை என்றாலும் கவுண்டமணி, செந்தில் இணைந்து செய்யும் காமெடிக்காகவே பெரும்பாலான படங்கள் 100 நாள்களுக்கு மேல் ஓடின.

இதுவரை 450 படங்களில் அனைத்து முன்னணி நடிகர்களுடனும் காமெடி செய்துள்ளார். இவருக்கு நடிகர் கார்த்திக்கும், சத்யராஜும் நல்ல மெமிஸ்ட்ரி ஓர்க்அவுட் ஆகும். 78-ஆவது பிறந்தநாளை இன்று கவுண்டமணி கொண்டாடினார்.

கோவை மாவட்டம், வல்லகொண்டாபுரத்தைச் சேர்ந்தவர் சுப்பிரமணி கருப்பையா என்பவர் தான் இந்த கவுண்டமணி. படப்பிடிப்புகளில் சாமர்த்தியமாக கவுன்ட்டர் கொடுத்ததால் கவுன்ட்டர் மணி என்ற பெயரானது. ஆனால் காலப்போக்கில் அதுவே கவுண்டமணி என்றாகிவிட்டது.

இவரும் செந்திலும் நடித்த வாழைப்பழ காமெடி, சூரியன் திரைப்படத்தில் அவர் கூறிய "அரசியலில்லே இதெல்லாம் சகஜமப்பா" என்ற சொல்லும் மிகவும் பரவலாக
தற்போது கூட பயன்படுத்தப்படுகிறது. தமிழகத்தின் லாரல்-ஹார்டி என இவர்கள் அன்போடு அழைக்கப்பட்டனர்.

16 வயதினிலே படத்தில் அறிமுகப்படுத்தப்பட்டதாக கூறப்பட்டாலும் அவர் அதற்கு முன்பு 1964-இல் சர்வர் சுந்தரம் படத்திலும், 1970-இல் ராமன் எத்தனை ராமனடி, 1971-இல் வெளியான தேனும் பாலும் ஆகிய படங்களில் டிரைவர் வேடங்களில் நடித்துள்ளார். இந்த கருத்துகள் சமூகவலைதளங்களில் பரவி வருகிறது.

இதுவரை 16 வயதினிலே படம்தான் கவுண்டரின் முதல் படம் என்று நினைத்திருந்தவர்களுக்கு இன்று ஒரு புது தகவல் கிடைத்துள்ளது. எது எப்படியோ கவுண்டமணிக்கு பிறந்தநாள் நல்வாழ்த்துகள்.

English summary

Today is Actor Goundamani's birthday. On this day one info about him roams in social media.