மனசுக்கு கஷ்டமா இருக்குங்க.. கருணாநிதி குறித்து மீம்ஸ் போடாதீங்க.. நடிகர் சதீஷ் வேண்டுகோள்
கருணாநிதி பற்றி மீம்ஸ் போட வேண்டாம் என நடிகர் சதீஷ் கேட்டுக் கொண்டுள்ளார்.
சென்னை: திமுக தலைவர் கருணாநிதி பற்றி மீம்ஸ் போடாதீர்கள், அவரை பற்றி மீம்ஸ் வரும்போது மனசு கஷ்டமா இருக்கு என்று நடிகர் சதீஷ் பொதுவான வேண்டுகோள் ஒன்றினை விடுத்துள்ளார்.
சென்னையில் இயக்குனர் ஆர். கண்ணன் இயக்கியுள்ள 'பூமாராங்' படத்தின் இசை வெளியீட்டு விழா சமீபத்தில் நடைபெற்றது. இதில் கலந்துகொண்டு நடிகர் சதீஷ் பேசினார். அப்போது அவர் பேசியதாவது:
ஒரு சமுதாயத்தில் நடக்கும் பிரச்சனைகளுக்கு எதிராக மீம் போட்டுவிட்டால் போதுமா? அத்துடன் நம்ம கடமை முடிஞ்சிடுமா? களத்தில் இறங்கி வேலை செய்யணும். மீம் பற்றி பேசும்போது, இன்னொரு முக்கியமான விஷயத்தை பத்தி சொல்லியே ஆகணும்.
அவ்வளவு பெரிய தலைவர் கருணாநிதி. அவரை பத்தி மீம்ஸ் வரும்போதெல்லாம் மனசுக்கு கஷ்டமா இருக்கு. அவருடைய வயசுக்கும், அவர் வகித்த பதவிக்கும் நாம கண்டிப்பா மரியாதை கொடுக்கணும். எனவே தயவு செய்து, யாரும் அவரை பற்றிய மீம்ஸ்களை போடாதீங்க. அப்படியே யாராவது அனுப்பினாலும் நீங்கள் யாருக்கும் ஷேர் செய்யாதீங்க"
இவ்வாறு சதீஷ் அந்த விழாவில் கோரிக்கை விடுத்தார்.