உள்ளாட்சித் தேர்தல் : நகராட்சி, பேரூராட்சி அதிமுக வேட்பாளர் பட்டியல் வெளியீடு
சென்னை: உள்ளாட்சி தேர்தலில் நகரமன்ற வார்டு உறுப்பினர்கள், பேரூராட்சி வார்டு உறுப்பினர்கள் பதவிகளுக்கான வேட்பாளர்களின் பட்டியலை அக்கட்சியின் பொதுச் செயலாளர் ஜெயலலிதா சார்பில் அதிமுக தலைமைக் கழகம் வெளியிட்டுள்ளது.
தமிழ்நாட்டில் 12 மாநகராட்சிகள், 124 நகராட்சிகள், 31 மாவட்ட பஞ்சாயத்துகள், 385 பஞ்சாயத்து யூனியன்கள், 528 பேரூராட்சிகள், 12,524 கிராம பஞ்சாயத்துகள் உள்ளன. இந்த அமைப்புகளில் பதவியில் இருப்பவர்களின் 5 ஆண்டுகள் பதவிக்காலம், வருகிற அக்டோபர் மாதத்துடன் முடிவடைகிறது.
இந்நிலையில், தமிழகத்தில் மாநகராட்சி, நகராட்சி, பேரூராட்சி, ஊராட்சிகளில் உள்ள உள்ளாட்சி பதவிகளுக்கான தேர்தல்கள் வருகிற அக்டோபர் 17 மற்றும் 19-ஆம் தேதிகளில் இரண்டு கட்டங்களாக நடைபெறும் என தேர்தல் ஆணையம் அறிவித்துள்ளது. தொடர்ந்து, வேட்புமனுக்கள் பெறப்பட்டு வருகின்றன.
தேர்தல் தேதியை, தேர்தல் ஆணையம் அறிவித்த மறுநாளே அதிமுகவின் முதற்கட்ட வேட்பாளர் பட்டியலும் வெளியானது. அதில், சென்னை மாநகராட்சி உள்ளிட்ட 12 மாநகராட்சியில் உள்ள வார்டுகளில் போட்டியிடும் வேட்பாளர்கள், 31 மாவட்ட ஊராட்சி வார்டுகளில் போட்டியிடும் அதிமுக வேட்பாளர்கள் பட்டியல் வெளியிடப்பட்டது.
இந்நிலையில், உள்ளாட்சி தேர்தலில் அதிமுக சார்பில் போட்டியிடும் வேட்பாளர்களின் பட்டியலை அக்க்கட்சியின் பொதுச் செயலாளர் ஜெயலலிதா வெளியிட்டுள்ளார். நகர்மன்ற வார்டு உறுப்பினர் பதவிக்கு போட்டியிடும் 3,613 பேர் கொண்ட பட்டியலை முதல்வர் ஜெயலலிதா சார்பில் அதிமுக தலைமைக் கழகம் இன்று வெளியிட்டுள்ளது. பேரூராட்சி கவுன்சிலர் பதவிக்கு போட்டியிடும் 8,288 பேர் கொண்ட பட்டியலையும் அதிமுக வெளியிட்டுள்ளது.