கிறிஸ்துமசுக்கு புது வரவு தைவான் நாட்டு 3டி ஸ்டார்!
தூத்துக்குடி: கிறிஸ்துமஸ் பண்டிகை வரும் 25ம் தேதி கொண்டாடப்படுகிறது. இதை முன்னிட்டு கிறிஸ்வத மக்கள் தங்கள் வீடுகளில் கிறிஸ்துமஸ் ஸ்டார்களையும், குடில்களையும் வேகமாக அமைத்து வருகின்றனர்.
கிறிஸ்துமஸ் பண்டிகை நெருங்கும் நிலையில், தூத்துக்குடி மாவட்டம் கோவில்பட்டியில் விதவிதமான ஸ்டார்கள் விற்பனைக்கு வந்துள்ளன. கொல்லம், எர்ணாகுளம், சென்னை உள்ளிட்ட பல்வேறு பகுதிகளில் தயாராகும் இந்த ஸ்டார்கள் தமிழகம் மட்டுமின்றி வெளி மாநிலத்திற்கும், வெளி நாடுகளுக்கும் கூட ஏற்றுமதி செய்யப்படுகிறது.
கோவில்பட்டி தெற்கு பஜார், கிருஷ்ணன் கோவில் தெரு, மாதாங்கோவில் தெரு உள்ளிட்ட பகுதிகளில் வண்ணமிகு ஸ்டார்கள், குடில்கள் விற்பனை செய்யப்பட்டுவருகின்றன.
இதுகுறித்து வியாபாரி ஒருவர் கூறியதாவது: கிறிஸ்துமஸ் பண்டிகைக்காக இந்தாண்டு தைவான் நாட்டில் தயாரிக்கப்பட்ட '3டி' ஸ்டார்கள் புதிதாக அறிமுகம் செய்யப்பட்டுள்ளது. ரூ.110ல் இருந்து ரூ.300 வரையிலான விலை கொண்ட இந்த ஸ்டார்களை கிறிஸ்தவர்கள் ஆர்வத்துடன் வாங்கி செல்கின்றனர்.
குடில்கள் ரூ.200 முதல் ரூ.600 வரையும், கிறிஸ்துமஸ் மரங்கள் ரூ.250 முதல் ரூ.500 வரையும் விலைபோகின்றன. இவ்வாறு அவர் தெரிவித்தார்.