ரூ. 70 லட்சம் கடன்.. ரூ. 1.23 கோடிக்கு சொத்து.. இதுதாங்க தீபா!
ஆர்கே நகர் தொகுதி வேட்பாளரளாக மனுதாக்கல் செய்துள்ள தீபா தன் சொத்து மதிப்பு ரூ.1,23,46,604 என்றும், 70 லட்சத்து 65ஆயிரம் ரூபாய்க்கு கடன் இருப்பதாகவும் குறிப்பிட்டுள்ளார்.
சென்னை: ஆர்கே நகர் தொகுதி வேட்பாளராக மனுதாக்கல் செய்துள்ள எம்ஜிஆர் அம்மா தீபா பேரவை பொதுச் செயலாளர் தீபா தன் சொத்து மதிப்பு ரூ.1,23,46,604 என்றும், கணவர் இல்லை என்றும் குறிப்பிட்டுள்ளார். 70 லட்சத்து 65ஆயிரம் ரூபாய்க்கு கடன் இருப்பதாகவும் அவர் தாக்கல் செய்துள்ள பிராமண பத்திரத்தில் குறிப்பிட்டுள்ளார்.
அசையும் சொத்துகள்:
•தீபா கையிலுள்ள ரொக்கம் - ரூ.3.50,000
•ஆந்திரா வங்கி , அடையாறு - ரூ.947
•பாரத ஸ்டேட் வங்கி, பாண்டிபஜார் - ரூ.1,77,367 பணம் டெபாசிட் செய்யப்பட்டுள்ளதாக தீபா கூறியுள்ளார்.
கடன்:
•ராஜா என்பவரிடம் ரூ.40,00,000
•சுரேஷ் என்பவரிடம் ரூ.20,00,000
•தினேஷ் என்பவரிடம் ரூ.10,65,000
•மொத்தக் கடன் ரூ.70,65,000 உள்ளதாகவும் தீபா குறிப்பிட்டுள்ளார்.
நகைகள், வாகனங்கள்
தன்னிடம் தங்க நகைகள் - 821 கிராம் உள்ளதாகவும் அவற்றின் மதிப்பு ரூ.23,80,900 என்று குறிப்பிட்டுள்ளார். வெள்ளிப்பொருட்கள் 1கிலோ இருப்பதாகவும் அவற்றின் மதிப்பு ரூ.1,72,000 என்றும் கூறியுள்ளார். 20 கேரட் வைரம் மதிப்பு ரூ.4,00,000 என்றும் தீபா கூறியுள்ளார். 2016ம் ஆண்டு வாங்கிய ஹோண்டா ஆக்டிவா உள்ளது அவற்றின் மதிப்பு ரூ.50,390 என்று குறிப்பிட்டுள்ளார்.
அசையா சொத்து
•1600 சதுர அடி நிலத்தில் 3200 சதுர அடியில் கட்டப்பட்ட வீடு. வாங்கப்பட்ட ஆண்டு 9-11-2006 வாங்கப்பட்ட போது மதிப்பு : ரூ.17,50,000 தற்போதைய தோராய மதிப்பு : ரூ.2,00,00,000
மொத்தத்தில் தனது அசையும், அசையா சொத்துகளின் மதிப்பு ரூ.1,23,46,604 என்று வேட்பு மனுவில் தெரிவித்துள்ளார்.
கணவர் பெயர் இல்லை
ஜெ.தீபா தன்னை ஜெ.ஜெயகுமாரின் மகள் என்றே குறிப்பிட்டுள்ளார். திருமணமான தீபா மனுவில் தனது கணவரின் பெயரை குறிப்பிடவேயில்லை. குடும்ப உறுப்பினர்கள் பட்டியலில் தீபா தனது பெயரை மட்டுமே குறிப்பிட்டுள்ளார். அவரது வீட்டில் இருந்து சமீபத்தில் வெளியேறிய மாதவன் பெயரை எங்குமே குறிப்பிடவில்லை. இவரது வேட்புமனுவை தேர்தல் ஆணையம் ஏற்றுக்கொண்டுள்ளது.