திருமயம் திமுக எம்.எல்.ஏ.ரகுபதி உள்பட 5 பேர் சாலை விபத்தில் காயம்
புதுக்கோட்டை: புதுக்கோட்டை மாவட்டம், அரிமளம் அருகே வியாழக்கிழமை பிற்பகலில் நேரிட்ட சாலை விபத்தில் திருமயம் தொகுதி திமுக எம்எல்ஏ- எஸ். ரகுபதி லேசான காயங்களுடன் உயிர் தப்பினார். அவருடன் சென்ற 5 பேருக்கும் காயம் ஏற்பட்டது.
திருமயம் தொகுதி திமுக சட்டமன்ற உறுப்பினர் எஸ். ரகுபதி தனது தொகுதிக்கு உள்பட்ட புதுப்பட்டி பகுதியில் வியாழக்கிழமை கட்சி நிர்வாகி ஒருவரின் துக்க நிகழ்ச்சிக்கு சென்று விட்டு பிற்பகலில் தனது காரில் புதுக்கோட்டைக்கு திரும்பி வந்துகொண்டிருந்தார்.
ஒத்தப்புளிக்குடியிருப்புப் பகுதியில் கார் சென்ற போது எதிர்பாராத விதமாக இரு சக்கர வாகனம் குறுக்கே வந்ததால் ஓட்டுனரின் கட்டுப்பாட்டை இழந்த வாகனம் சாலையோரம் உள்ள வயலில் கவிழ்ந்தது. இந்த விபத்தில் லேசான காயமடைந்த எம்எல்ஏ- ரகுபதி உள்பட 5 பேர் புதுக்கோட்டை அரசு மருத்துவமனையில் முதலுதவிச் சிகிச்சை பெற்றனர். பிறகு ஓய்வுக்காக புதுகை கிழக்கு இரண்டாம் வீதியிலுள்ள தனது வீட்டுக்குப் புறப்பட்டுச் சென்றார் ரகுபதி. இவ்விபத்து குறித்த தகவல் அறிந்த திமுகவினர் அவரது இல்லத்துக்கு திரண்டு சென்று நலம் விசாரித்தனர்.