நடிகனாகி இருந்தால் ஜெயலலிதாவுடன் படம் நடித்திருப்பேன்.. சட்டசபையில் துரைமுருகன் கலகல
சிறு வயதில் நடிப்பை தொடர்ந்து இருந்தால், சினிமாவில் ஜெயலலிதாவுடன் நடிக்கும் வாய்ப்பு கிடைத்திருக்கும் என்று இன்று சட்டசபையில் திமுகவை சேர்ந்த துரைமுருகன் பேசியுள்ளார்.
Recommended Video
சென்னை: சிறு வயதில் நடிப்பை தொடர்ந்து இருந்தால், சினிமாவில் ஜெயலலிதாவுடன் படத்தில் நடிக்கும் வாய்ப்பு கிடைத்திருக்கும் என்று சட்டசபையில் திமுகவை சேர்ந்த துரைமுருகன் பேசியுள்ளார்.
இன்று சட்டசபையில் நிறைய சுவாரசியமான சம்பவங்கள் நடந்தது. நேற்று கிமு கிபி வார்த்தைகளை பாடப்புத்தகத்தில் இருந்து அகற்றியது, இசை நிகழ்ச்சி குறித்து துரைமுருகன் காமெடி செய்தது என்று நிறைய கலகலப்பான விஷயங்கள் நடந்தது.
அதேபோல் இன்றும் துரைமுருகன் சபாநாயகரை இடையிடையே வம்பிற்கு இழுத்து காமெடி செய்தார். சபாநாயகரும் விடாமல் காமெடியாக அவரை கிண்டல் செய்தார்.
இன்று பேச தொடங்கிய துரைமுருகன், இந்த அவையில் எல்லோரும் நடிக்கிறார்கள். ஆளும் கட்சி, எதிர் கட்சி, சபாநாயகர் என்று எல்லோரும் நடிக்கிறார்கள். ஷேக்ஸ்பியர் எல்லா அரசியல்வாதிகளும் நடிகர்கள் என்று கூறினார், அதேபோல்தான் இங்கும் எல்லோரும் நடிக்கிறார்கள், என்றார்.
இதற்கு சபாநாயகர், ஆமாம் எல்லோரும் நடிக்கிறார்கள், நீங்களும் நடிக்கிறீர்களா? நீங்கள் இதற்கு முன்பு நடித்து இருக்கிறீர்களா என்று கேள்வி எழுப்பினார்.
அதற்கு துரைமுருகன், ஆம் நான் நன்றாக நடிப்பேன். சிறு வயதில் இருந்தே நாடகத்தில் நடித்து இருக்கிறேன். பின் நடிப்பதை விட்டுவிட்டேன். நான் நடிப்பதை தொடர்ந்து இருந்திருந்தால், ஒருவேளை சினிமாவில், ஜெயலலிதாவுடன் நடித்திருப்பேன் என்று கூறினார்.
அவரின் இந்த பதிலை கேட்டு அவை மொத்தமும் சிரிக்க தொடங்கியது. துரைமுருகனும் சிரித்துக் கொண்டே இருக்கையில் அமர்ந்தார்.